دونت أنا هذي القصيدة يا عسى تقراها
في يوم لى طاحت بيدها صدفة المجله
ودي تعرف بوسط قلبي حاضره ذكراها
و اني عليها ف كل لحظه هايم و متوله
و ان الخفوق اللي تعذب من ظما صحراها
محتاج لشوية وصل منها يجي و يبله
و ان العيون اللي بكت ع دربها و مسراها
تتمنى شوفة زولها تلمح ولو بس ظله
و ان السبب يا اللي بهجر عشرة عمر أغراها
ما زال جاري البحث عنه ما قدرت أوصل له
وابغي تعرف ان شوق قلبي في البعد جاراها
لكن عجز انه يكمل درب لا ما يدله
و انها حياتي م الجفا تغير ترا مجراها
صارت لغز غامض محير صعب حد يحله
و اني كتبت حروفي هذي و منيتي تقراها
يمكن تحس بنبض شوقي لى مسكت المجله