راسي ذبحني والسبب ما تقهويت=الله على كيف ٍ يطير اعماسي

ما اشوف من كثر الضرم لو تواظيت= ومن الضرم كن الهبايب براسي

حاولت اكمل سيرة الدرب وزريت=وما فالطريق الا عصير وبباسي

ياليتني قبل اتحرك من البيت=اخذت من حب اليماني مقاسي

وانا اخبر لمن عن القهوه ابطيت =تثر على نفسي وخمس الحواسي

حتى ليا مني بغيت وتسويت=طبخه من البريه تعدل راسي

عزالله اني ما نسيت او تناسيت= ما كنت عن كيف اهل الكيف ناسي

كنت احسبني في طريقي ليا جيت= اول محطاته بزايد حماسي

إليا طلبت الدله يقول حييت= وجيبها حسب الطلب عن اعماسي

لكنْ عكس الهقوه اللي تهقويت=قابلت في كل المحطات يأسي

ياليتني داري عن الغيب ياليت=((ما كان اسوي بالقصيد اقتباسي))

غنيت بيت ٍ لبن مربح يا هو بيت= ((نوب ٍ يهين النفس شيءٍ طفاسي))

عز الله اني يابن مربح ما سويت= وانا من اهل الكيف طبعي وساسي

ما كان عن موقف حصلي تغنيت=ولا صار للهاجس صدى وحتباسي

وعشان ما ادور على راعي البيت=والا محطة متعبين التكاسي

توبة عليّ من لحيتي كان نوُيت=على السفر لخذ دلال وكراسي