قبيلة بني رشيد - قصيدة ( عز الأكابر) ارجوا أن تنال اعجابكم.

عز الأكابــــــر

ياشينها لامات.. حلم المثابر= اللي تعلق فيه من يومه أصغير

يبكي بصمت ومستصيب و يكابر= على جروحه.. ما يبي يجرح الغير

بضحك وقلبه للمواجع مقابر = صمته أنين وضحكته لونها غير

مطعون من غالي ويجحد وصابر = للجرح نزف ويقتنع بأي تبرير

مخدوع يحسب للمناظر. مخابر =وأثره وهم يرجيه بالواقع أيصير

وليا تذكر و أجمل العمر عابر=والعمر مره والليالي مدابير

تضيق في عينه جميع المعابر= و كن الحياة بنظرته تالي أعصير

مر الندم. والحب. ملعون ثابر = مره حلا وأشواك دربه نواوير

يا صاحبي.. لو جبت كل المحابر= ما تكفي.. أشتات المعاناة تصوير

هذا الزمان اللي يقولون.. غابر= تقتلني الحسرة وأنا حي وأسير

من يسألك قله على ما نت خابر= ضلع(ن) تصافق به رياح المقادير

به صمت(ن)ابلغ من جميع المنابر= وفي داخله سر وحكايا وأساطير

واقع.. تجلى فيه عز الأكابر= مير الزمن.. من طاوله ما هو بخير

شعر : نشمي الرشيدي