قبيلة بني رشيد

ياشينها لا صرت معجب و ( خجـلان )
خوف المصـارح لا يجيـب المطمّـه

اخاف اصارح بالغلا ( ذاك الإنسـان )
ثم ينقلـب ( جـوو المصـارح مذمّـه)

ويا شينها لا صرت مغرم و ( زعلان )
محد ٍ يراضـي قلبـك و ( محـد بيمّـه)

وان رحت محد ٍقال لك (وين يافلان)
روحتك مع جيّتـك .. ماهـي مهمّـه

ويا شينهـا لا صـرت عايـش بحرمـان
مثـل اليتيـم اللـي فقـد شوفـة أمّـه

ماخوذ حقّـه وانظلـم شـوف الأعيـان
واللي اظلموه (عيال لحمـه و دمّـه)

ويا شين صاحب دربك ان صار ثعبان
لا هو تركـك و لا نفـث فيـك سمّـه

كنّـا خويّـا كنا انتسمّـى بـالأخــوان
واليـوم أسمـه بأخبـث النـاس سـمّـه

ويا شينهـا لا صـرت ناجـح و ندمـان
( وصلت قمّه ) (و اعتلا الغير قمّـه)

مثـل الإمـام .. العالـم بفقْـه الأديـان
يومه نجح .. والكـل صـاروا ( أأمّـه )

ويـا شينهـا لا صـرت تايـه وحيـران
وسط الطريق .. و باقي فيك همّـه

ودّك ترووح .. وآخر الـدرب مـا بـان
تخاف تمشـي .. ( ثـم تغشـاك غمّـه )

ويا شينهـا لا صـرت مبلـي ومنهـان
والعلـم كلّـه .. مـن اكاذيـب نـمّـه

مـا فيـه ضـدّك لا دلايـل وبرهـاان
ودخّـان نـارك مستحـيـل ٍ تشـمّـه

ويا شينها لا صرت مـن روس الاعيان
ثـم تنقلـب فـي نظـرة النـاس رمّـه

ويلااااه يا وقـت ٍ نـوى لـي بعصيـااان
أثـر الزمـن يـا نـاس مـا فيـه ذمّـه

طرد المقفي شين لو كنت ولهان
ياخـذه شيطـان الغـروور و يخمّـه

يظـن بنّـك هايـم ٍ بــه وشفـقـااان
ما يدري انّه لـو فطـس ... مـا تهمّـه

ومااشين مـن معاشـر قليلين الإيمـان
درب الهداية .. لا .. أبـد ... مـا تتمّـه

الخلْق سجـن وصاحبـك فيـه سجّـان
والعلم خال العز .. ( والجـود عمّـه )

ويا شينها .. وأصلآ بقى شي ما شان ؟
هـذي الليـالـي طبعـهـا مدلهـمّـه

الشيـن والله شيـن غالـيـن الأثـمـاان
لا قام كـلن ٍرافـعن ٍفـوووق خشمّـه

( ويا زينها ) لا صرت لاهي و طربان
وحبـل القصايـد يرتجـيـك و تلـمّـه

يا ليل دانه .. ليل دانـه .. لا لا .. دااان
ما فيـه ثـوب ٍ يستـر أطـراااف كمّـه

يا زينها لا صرت معجـب و ( خرمـان)
ثنثـر علومـك لـو تجيـب المطـمّـه