يا عيون سلطان لا تبكن لا لا ابكن

* حسبي على اللي ظلمني واللي أبكاكن

لا صار دمع الأسى يشفي مواجعكن

* لا والله إلا أبكن ابكن وأنثر ماكن

صاحبت السهر وحمرة مدامعكن

* واللي تبنه تمننه ولاجاكن

غالي وطاريه ينفعني ونفعكن

* بعيد عنا وهو في وسطكن ساكن

اليوم من بعد ولعني وولعكن

* ذكراه تحصيل ذكرايه وذكراكن

والا الهنى والفرح مبطي موادعكن

* والهم يزداد والوقت أيتحداكن

والحل ما هوب لا عندي ولا معكن

* بين الغرابيل حديتن على اقصاكن

وأحزاني اللي تصافحني تصافحكن

* أذاني الحظ بالمقسوم واذاكن

من داعي البين بيعني وابايعكن

* لا زاد هات ولا منه نقص هاكن

عن شوف مالاق يمنعني ويمنعكن

* الواقع اللي على التعذيب وداكن

من مبطي الوقت يفجعني ويفجعكن

* ومن مبطي الخوف خاواني وخاواكن

حذف المقادير روعني وروعكن

* والغيب فالدرب قدمني ويتحراكن

هاجوسي الصلف يلذعني ويلذعكن

* ومن فكة منه ما أمداني ولا أمداكن

يم التهاليك يدفعني ويدفعكن

* يفعل ويامر وينهاني وينهاكن

لو شدة الهول تجمعني وتجمعكن

* على المواجيب مبدايه ومبداكن

ولو الملذات تغريني وتشبعكن

* غير المباحات واياني ووياكن

والصبر لو طال يقنعني ويقنعكن

* لو فالمتاهات ممسايه وممساكن

لا بد الافراج يفرحني ويفرحكن

* وتشوفن النور صاطع بعد ظلماكن

أما يجي الظهر والا أنه يصبحكن

* والا مع الليل والاحزان تفداكن