الليله هذى واضحه ليلة أفراق=حاولت أعديها وعيّت تعدي
بيتٍ يقوله ( ثامر) العام بأحراق=واليوم أرّده عقب ما باح سدي
أثر الفراق هموم ماهيب تنطاق = من وين مالديت وجهي تلدي
ضاقت بي الدنيا وصدري بعد ضاق= ودي أشق الجيب من ضيق ودي
أفكار تشقيني مع الليل تنساق= وأفكار لا زادت همومي تهدي
أضحك وأسولف كن مانيب عشّاق = وأنا قتيل العشق من فعل يدي
والعشق كم دمّر وكم نشّف أرياق= وكم عاشقٍ صد وتنـدّم وردي
وكم عاشقٍ متعب ورى خلّه الساق= حبل الوصل يرخيه نوب ويشدي
وأنا سماء جوّي غيـومٍ وبراق= هبّـت عواصفها ولا بـه مصدي
عقب التواصل واللقاء عقب الأشواق = ظروف وقتي صارت اليوم ضدي
بانت بوادر هجر وجروح وأرهاق = ودمع الفراق وسهر ليل وتحدي
ولو قلت أبصبر عنه مانيب مشتاق = أنا أشهد أنه كذب ماهوب جدي
وشلون بصبر والغلا فيـه دفاق = وطيفه مخاويني يغيـب ويردي
أما يجي ويصير للقلب ترياق = وإلا يروح ودمـع عينـي بخدي
الليله هذى بعثرت كل الاوراق = حاولت اعديها وعيت تعدي