حبيب النور ) .. ويصافح يمينه = ودايم بالوفاء .. مبدا التبايع
حقايق منبعه .. تجعل عرينه = مناجم .. منتهى حفظ الودايع
هذاك ..( الليل ).. لا غطّت يدينه = على ارض ٍ .. نصها بالنور ذايع
خلقه الله .. على حكمه متينه = بديع ٍ .. سخّر آياته بدايع
جعله الله .. ( سبات ) ..لعابدينه = بعد طرد المعيشه .. والمتايع
صلاة ٍ بآخره .. برد وسكينه = وصلاة ٍ قبلها .. حفظ وشفايع
مع الثلث الاخير .. لمدعينه = نزل .. رب السماوات الرفايع
عطى رزقه .. فقارى ٍ طالبينه = وحقق .. مطلب الناس الضرايع
ذكره اللـَـه .. بآيات ٍ مبينه = و امر فيها .. ( التدبّر ) بالصنايع
وانا .. بآصف جوانبه الرزينه = واروّض .. كل حرف ٍ فزّ ثايع
بأوصّف .. واجعل ( الشعر ) الرهينه = ما دامه .. موهبة خير ونفايع
واخاطب .. نعمة ابنادم .. ودينه = وعقل ٍ .. ميزته سد الذرايع
نعيش الليل .. والروعة سمينه! = وننسى روعته .. عند المنايع؟
مزايا الليل .. مع دورة سنينه = مثل ماهي .. ( روايع في روايع )
غموضه ( علم ) .. يذهل باحثينه = غموض ٍ .. ما اكشفه فكر وسمايع
سِتر .. سر الجميع .. وعاشقينه = تحت ستره .. يفلون الشرايع
اذا ( صمته ) .. على اسرار ٍ دفينه = ترى ( همسه ).. مواصيل وقطايع
براده .. لا اسدل استار السكينه = طموح ٍ للبشر .. بـأيّة طبايع
ظلامه ..( وجه ) .. في عالية زينه = بأصفها وصف .. بدروب السنايع
بأقول .. ان ( القمر عينه ) .. وعينه: = ( شهر ) .. لا غض طرف ٍ كان جايع
واقول ان النجم .. سامر ضنينه = تلالا بالسماء .. حب ودفايع !
تلالا .. يعكس النور ويبينه = ولو حال السحاب !! العذر شايع :
اكيد الشوق .. لا حرر سجينه = يذوّب ما حمل .. في كل خايع
هطوله بوح !! لا عانق جبينه = له الديجور غنى .. بوح رايع
( منامه .. بحر ) .. وايدينه سفينه = ركبها .. شاري الدنيا وبايع
ذبوله ..( عقد ) .. تكريم لقرينه !! = مع ..( اول نور).. يبدا الليل ضايع
ويصحى النور .. وتقوم المدينه = وذروة شوقهم .. رد البضايع
خفوت النور .. ( نفحة ياسمينه ) = بعثها نور .. واغضى الليل طايع
تعاقب ما اختلف .. بينه وبينه = محدد دورته .. رب الشرايع
عجيب الليل !! والله لا يهينه = خذاني شوق .. واتحفته بدايع!
اعيشه حب .. لو ما اسمع حنينه = يكفّي .. راحتي .. لا نمت ضايع
اعيشه حزن .. بأوقات ٍ حزينه = واعيشه حب .. واهديه الودايع
احب الليل .. في قسوه ولينه = فريد الوصف .. محمود الطبايع