البيرق اللي على قمة جبل طارق=عارٍ حنى الهامه اللي طال عاتقها
جيت أسأله يوم شفته بالحزن غارق=واقول شف حابس العبرات مطلقها
ياورثنا اللي من المسروق للسارق=ياأغلى المراقيب لو ماكنت شاهقها
مابين مغرب رضاك وغيظك الشارق=ذكرتني حصة التاريخ ماأصدقها
من طيب حظك ومن تفكيره الخارق=ساق المناوي وقال الله يحققها
ماكنك اللي مرق من جانبك مارق=للوادي اللي فلول الذل فرقها
ماتذكره يوم مرّ الماء كما الزارق=لميت جنده ولم السفن واحرقها
ماتذكر الخطبه اللي سرّت البارق=والخيل والريح والعزه وبيرقها
ماتذكر الغاده اللي غصنها وارق=من سربة الحق ترجي ثار خافقها
ماتذكر الفرقتين وشاسع الفارق=والسبع الايام ماتذكر دقايقها
الموت مثل الحياه أطماع ومزارق=(والأندلس) تنتظر ميعاد عاشقها
بوابةٍ قبل ماتنشد من الطارق؟=هبايب المسك ساقت ريح طارقها
لين أرجهنت وغنا شوقها الحارق=من أول أبراجها لآخر حدايقها
ياأغلى المراقيب أنا رحّال ومفارق=والكلمه اللي تزيد الهمّ أبنطقها
طارق وروّح تصبّر ياجبل طارق=لو رزّت القوم في رأسك بيارقها