الحمد للمعبود بالزين والشين=على سلامتنا اللي الله كتبها
أنا وبنتي ووْلدي وأريش العين=اللي الحياة بدونهم ما احسبها
ناظرت بأحبابي وأنا بين نارين=والنار في جوفي تزايد لهبها
أشوف نار الحزن والهجر والبين=وْنار الجروح اللي ضلوعي حطبها
كني بغيبوبة من يسار ويمين=أحيان تغلبني ونوب آغلبها
قضبت (نورة) هي و(نايف) باليدين=وْ(وردة حياتي) قلبي اللي قضبها
وْحملتهم وأنا أحمل الجرح جرحين=يمّ العيادة والجروح بعطبها
والحمد لله كلّبونا سليمين=نعمة من الله والله اللي وهبها
سلامة الغالين تسوى الملايين=وْتسوى جميع كنوز االارض وْذهبها
يالله عسى ماصار ياحامي الدين=من الحوادث والمصايب سببها
تطهير لذنوبٍ لها سنين وسنين=ذنوبي اللي بالعمر مرتكبها

اقتباس من مشاركة ولد حايل (المشاركة 2917988) الله على هذا الكم الهائل من الابداع ابحرت بنا في قصة من الواقع حمدا لله على سلامة الاهل والاولاد وتطهير ذنوب ان شاء الله عبدالله عوجان تغيب مده كي ترجع بجديدك المملؤ بالابداع ونحن مع كل غيبه ننتظر بريقك فلا تطل الغياب