يالله ياللي وان بدينا نبديك=يارب يامنشي ثقيل الخيالي
انت الاله اللي نخافك ونرجيك=وانت الودود اللي عليك اتكالي
المحسن اللي ماتعدد حسانيك=راعي العطا معطي العطايا الجزالي
غافر ذنوب المذنب اللي يناجيك=عشنا بعشك ياعزيز الجلالي
والثانيه ياسيدي مرحبا فيك=حييت يارمز الوفا والمعالي
حييت ياللي تفعل الخير اياديك=شيال حمل سيدي مايشالي
على دروب الخير بانت مساعيك=واكبر دليل المركز اللي قبالي
طابت لك ايامك وطابت لياليك=ورفعت لك البيضا على كل عالي
عبدالرحمن اللي نعزك ونغليك=معزتك بقلوبنا اول وتالي
كم من فقير ومن يتيم يحييك=لاحل لك طاري وجالك مجالي
نسل الحرار اللي بعيده مراميك=ساس الملوك مطوعين الرجالي
يابن الزعيم اللي بطيبه مضريك=وحد جنوب المملكه والشمالي
حقق فعل نادر ولافيه تشكيك=ماحققه عنتر وزيد الهلالي
عبدالعزيز اللي على الخير موصيك=وصية الليث احفظوها عيالي
بالشعر لانوفيه حقه ولا اوفيك=لو استمر اقصد سنين وليالي
واسلم سلمت الله يحفظك ويحميك=في جاه رب كل يوم يسالي
وتمت وصلى الله على خير داعيك=محمد اللي للرساله يسالي