قبيلة بني رشيد - لا تقول حزنك غير قل طيحتك غير

الحزن ماله بعض الاحيان , تفسير
. . . . . . حتى ولو يترك بوجهك .. علامه

يلي تعبت .. إمن الجفا و المعاذير !
. . . . . . مثلك كبيــره طيحته , و إنهزامه !

هذا انت تقطع للطموح .. المشاوير
. . . . . . وتـذّب هامه ثم تطمح .. لـ/هامه

لا تقول حزنك غير , قل طيحتك غير !
. . . . . . وإكسر خضوعك .. بالصبر و إبتسامه !

وإليا ظميت , وما بقا للصبر .. بيـر !
. . . . . . إرسم على حد الرجاوي .. غمامه !

بتشوف في رمضى زمانك , تباشير
. . . . . . وبتطير من غصن الأماني .. حمامه

عيش إ/متفائل و إعرف ان ربك كبير
. . . . . . ما ظـام منهـو , جاير الوقت .. ظامه

على الأقل , صبرك على الحزن تكفير !
. . . . . . عن ذنب معمي , عين قلبك ظلامه !

وكذاب قايل .. دنيَتك ما بها خير !
. . . . . . { لله حكمه , في تصرف أنامه }

عشنا بذالدنيا , و نبقا مسايير !
. . . . . . وكل ٍ بيحصد , مازرع من أثـامه !

و عمر البنادم , حتى لو يبطي قصير
. . . . . . و يعيش له ذكره .. و تدفـنْه خامه !

و أنا .. يلو كثِرت علّي المخاسير
. . . . . . يكفي ضميري , ما خسرت إحترامه !

ومدري وش إلّي صار , أو ويش بيصير !
. . . . . . تــايه , على حـد الأمل .. و إنعدامه

تصدق لي الدمعه , ليا خان تعبير
. . . . . . و إليا تباطا , جفن عيني .. منامه !

ويضيع بالي .. بين سجّه و تفكير
. . . . . . ولا كسبت .. إلا التعب , و إهتمامه

ويلعب بي الغربي , ليا ذعذع عصير
. . . . . . و أفقد خفوقي .. لا سرابه هيامه !

ياوين ابلقا .. يـ/ آخر الصد تبرير !
. . . . . . للي ترك , في خد الأيـام .. شامه !

اقفا و قصّر بي .. ولا جاه تقصير
. . . . . . وشلون حتى .. باخل ٍ بي سلامه !

لاشك , يبقا له معـزّه و تقديـر
. . . . . . و ما زال , ذا قدره .. و هذا مقامه

و يا صاحبي , لو إخذلـتـْك المقادير
. . . . . . لا تنكســر , لو كان .. مابه سلامه

شفني خسرت كثير و كثير و كثير !
. . . . . . ومازلت أعيش .. و راس مالي كرامه !