قبيلة بني رشيد - طاروق رائع بين الشاعر الكبير عبدالرحمن خضير والشاعر المبدع زايد ابن عدله

السلام عليكم ورحمة الله وبركاته
مساء الخير

الطاروق رائع من وجهة نظري وساخن جداً وهو اول محاوراتهم بهذه الصيفيه وعساه فاتحة خير على قولة الامثال الطاروق من حفله بتاريخ 21/7/1432
زايد ابن عدله
ابتداء الطاروق وسهيل اليماني=خابرً مطلاع نوره من مغيبه
يالرويضي طيع شوري لاتعصاني=خلنا يخلص طليبً من طليبه
عبدالرحمن خضير
ابتداء الطاروق والبعد يحداني =وابتلشنا بالبعيده والقريبه
ماني مطاوعك بالصمد البياني= تدري اني شنب مارضى بالغليبه
زايد ابن عدله
عيد الاضحى من عقب عيد ارمضاني=مير وش سويت ياراع النجيبه
وانت يابن خضير شاعر شقلباني =مابقى الا الطير تشرب من حليبه
عبدالرحمن خضير
انت الك نيه وعلمك مايخفاني=مير نفذ مايجيك من الكتيبه
والا خلها بين هيل وزعفراني=بعد أكلت الفجل من نفسً غضيبه
زايد ابن عدله
انت كل بالوقت من حمر الصياني=وان جفاك الضلع حوّل في شعيبه
ويش اسوي في عيال الهيملاني= لحيةً ماتحمي الشارب تعيبه
عبد الرحمن خضير
تحسب ان الموز مثل البرتقاني=وتحسب ان طويق يشبه للجذيبه
لاتقول انك فهيم ومودماني=وانت كل اللي على بالك تجيبه
زايد ابن عدله
مرّت الاولى والاخرى في ثواني = وانت فاغر فمك في بطن الزريبه
روّحت بالسيف شعّار اقحطاني=لو تقول الشعر شعاره عتيبه
عبد الرحمن خضير
ماتغش الناس هطلان الاذاني=وعنتر العبسي ماعيبته زبيبه
فرق في لهجة سعودي عن يماني=وانت لو ننهاك طبعك ماتسيبه
زايد ابن عدله
ماتقومني وتجلس في مكاني =لو فقد مصر الحبيب احمد نجيبه
ماتوقعتك اليا هالحد اناني= مير اظنك من ضريبه في ضريبه
=========================
اتنمى لكم قراءة ممتعه وياليت تبدون رائكم في المحاوره
وشكراً لكم
اخوكم / الدااااااهيه