قبيلة بني رشيد - انا مثل ذكرى قديمة بجدران والا رسم ناقص مدون على لوح

انا الذي في داخلي الف عنوان
للبعد والحرمان والحزن والنوح
يقرى على وجهي علامات ولهان
ويشاف دمعي ياجماعة ولا ابوح
مشتاق انا لوصال مخدور الاعيان
شوق السجين لشوفة الباب مفتوح
اتذكره واشوف جو السهر زان
واشتاق انا لعناق واعتاب ومزوح
جاني خبر انه من العام شفقان
حتى بمنامه صرت انا اجيه واروح
ربي يحفظه من قليلين الايمان
ويصونه بجاهه وضيقاته تروح
ربي يسره ويبعده درب الاحزان
ويكفيه ربي عين حاقد ومشفوح
حبه سطى بقلبي وتفجرت بركان
وثور مشاعر خامدة داخل الروح
قدح بزند البعد والشوق نيران
ومن الوله في ضامري جمر يفوح
اباصلك والدرب مليان عدوان
واخاطر بنفسي ولو روحي تروح
انا مثل ذكرى قديمة بجدران
والا رسم ناقص مدون على لوح
ماتنفع الذكرى على جدار تعبان
مل الوقوف ومابقي منه مطروح
ولاتنفع الرسمة على اللوح بالوان
لاصار هذا الشكل ناقص وممسوح
شريتك بروحي وحاربت فرسان
ولاشلت هم الجرح لو طحت مذبوح
انت الغلا ياصاحبي وانت سلطان
ولك الوفا لو تجرح القلب مسموح
من هو يبي قربي من الناس غلطان
ياصاحبي مشريه لوكان مملوح
في صحبتك والله ماني بندمان
ولااندم على اللي عشرته لي على صروح
ياسيدي مااندم على عشرة ازمان
اندم على اللي عشرته يوم وتروح
وصفه خيال ومبسمه جمر شعلان
وبرق المنايا داخل اعيانه يلوح
انا عطيتك عطف مع روح وجدان
عشق عفيف ولا مشينا لمصلوح
قبل اعرفك تايه بغربة وحيران
ولحظة لمحتك شفت انا النور بوضوح
قبلك نديم الصمت وآلام حرمان
=واحلام عمري دمها كان مسفوح
دامك تمناني انا بسهر اجفان
واصون حبك والخطا منك مدموح
اسهرت انا لذكراك مليون شيطان
وهذا كلامي جاك في شعر مشروح
كتبت شعري يوم درب السهر زان
ابيه ياصل صاحب منه مجروح

الشاعر المغرم اليائس