ياسهيل سلملي على سيد الأحباب=حيثنكم ياسهيل وسط النجومي
بلغ سلامي لريش العين بخطاب=ودي أخفف عنه بعض الهمومي
لاجيت من فوقه ترقب ترقاب=وأضن خلي لانظركم يقومي
علامة المجمول دمعه بالأهداب=أسباب فرقاً جعلها ماتدومي
ياسهيل قلي شلون حاله بعد غاب=يالله عسى ياسهيل مهو مهمومي
مبغى أدموعه يحرقاً سود الأهداب=وتحرق خدود الزين زاه الوشومي
ياسهيل من بعد الغضي صرت منصاب=أسهر طوال الليل ورعى النجومي
غديت مثل ألي جلا لدار الغراب=ورجله كسيرة وعاجزاً لا يقومي
ولا سجيناً سكروا دونه الباب=ومن دون باب السجن ناساً تحومي
مظلوم ولي ظالمه كل الأقراب=ومه تصيح وتنتخي للعمومي
وصدر قراره والأمل عندها خاب=من هئية التمييز بميم مختومي
بقولها ياسهيل والدمع سكاب=مثل المطر ياسهيل وسط الغيومي
بليت في شخصاً صغيراً وجذاب=في بحر حب الزين صرنا نعومي
لي قصةً وياه من سمعها شاب=حتى ولو يسمعه ميتاً يقومي
ولو تشرحه لقائد الصرب كان تاب=وحتى رضيع الديد منها يصومي
حبي لها عامين محفوظ بحساب=وزوداً على العامين تسعين يومي
من أولاً لاجيتها تفتح الباب=وتسيل دمعتها بفرحت قدومي
وتضمني لصدرها بكل الأعجاب=وتشبك يديها من ورايه لزومي
واليوم حل أفراقها وشفت الأتعاب=وذقت التعاسة والشقى والهمومي
فارقتها ياسهيل غصباً بلا أسباب=أسباب من ماذاق لفح السمومي
ناساً جداها بس تفريق الأحباب= لو يسمع المزحه نشرها علومي
هذاك جعله يوم توزيع الأكتاب=يعطى كتابه بيسارة يعومي
وجعل حديد النار بالجوف صباب=ولا يعقب لدنياه مثله رسومي
وياسهيل أنا بوصيك من قبل لا تغاب=قل للغضي يصبر وربه رحومي
ياسهيل أنا منساه لو كثرة أسباب=في السلم وإلا الحرب محنا رخومي
ياسهيل شاب الراس رغم العمر شاب=ومن شاف حالي صد وبيديه يومي
وعفنا الوطن ياسهيل وأهلي والأقراب=وزادي كرهته وبلشتنا الهمومي
لاكن أبصبر دام للصبر مقضاب=ونرجي ولي العرش منش الغيومي
ولاكل من يرمي الهدف للهدف صاب=ولي كتب باللوح لازم يدومي
وأسلم وسلملي على كل الأصحاب=وبلغ تحياتي لكل النجومي