يازينها لا صار مقطوع الارسال=شمال الابيض في بطون العثامير
لا دردشه لا ايميل مافيه جوال=مرتاح بالي من جميع التفاكير
ما غير اللحن طرق واجر موال=وخوة نشامى والنياق المغاتير
في حرة الابطال واحفاد الابطال=بني رشيد اعيال عبس المناعير
هنا منازل عبس منزال منزال=وهنا مراتع ابلهم العصافير
يالله تسقيها من الوبل همال=في قدرتك ياعالم(ن)في المقادير
فوق القرى والوسم باقي ولازال=ومن الخباري لين حرة زبيعير
منه الرمه يصفق من الجال للجال=ومنه القهد يهدر تقول انه بعير
وتشوف بعد السيل ما يشرح البال=لون العشب من تحت صفر النواوير
تلقى سلايل عبس ركبي وخيال=كلن ورى ذوده يسوق المظاهير
وكلن عصب راسه ولا يلبس عقال=وزاده لحم ارنب ودرالمصاغير
ربعن لنا في قمة المجد مدهال=وايماننا بالله ورد ومصادير
وعاداتنا طنخه ياهل روس الاموال=ما همنا جمع الذهب والدنانير
واصل الذهب لا صار مقطوع الارسال=شمال الابيض في بطون العثامير

اقتباس من مشاركة راسبه بالحب (المشاركة 2066777) سلمت الايادي ابيات رائعه