أبكتب التاريخ باحروف وسطور=بابيات شاعر ماتغير لحونه
تاريخ لأهل المجد والفعل والشور= بني رشيد ورايهم يجمعونه
ليا كتسى وادي من الوسم ممطور= أحفاد عبس بطرشهم ينزلونه
بوضحٍ وملح دونهن خيل وسبور= واللي يحاول كسبهن يدبونه
وشعلٍ وحمر وصفر تقهر بمقهور= وشقحٍ عليهن وسمهم ياسمونه
كفه على أيمن فخذ حلقه ومجرور= يعرف بها العبسي وتعرف ضعونه
ليا شافها الغازي توقف على الفور= بين الطمع والخوف تكثر ضنونه
يدري وراها موت والموت محذور= وباب السلامة عبس ما يفتحونه
البل لها تاريخ وأدوار وعصور= تاريخها الفريس ما يجهلونه
من دونها طابور يفتك بطابور= قبل البلاد ملوكنا يوحدونه
واليوم حنا بأمن وفراح وسرور= أمن البلاد ملوكنا يحرسونه
واللي عطاه الله من مد ميسور= يشري فحلها لايتغالى ثمونه
وليا بدت حاجه فلاهو بمعسور= يبيع في مليون بنت اللبونه
البل ذكرها الله وهو خير مذكور= في محكم التنزيل خلقه يصونه
سفن الصحاري تصبر شهور وشهور= على الظما والجوع فيها خشونه
من خلقت الدنيا لها وصف مأثور= أوصافها وألوانها يذكرونه
وضحٍ وصا يفهن مثل شعت النور= ومن الوبر لون القطن يقطفونه
وبعيرهن مزيون بالزين مغمور= أوضح سناد ونابياتٍ متونه
وملحٍ وصايفهن كما الغيم مأمور= خيل على حره وساقت مزونه
وبعيرهن بطنه كما قوس باكور= أملح سها وياً كما الكحل لونه
وشعلٍ كما الصوان الأشعل لهن طور= من شعلة الصوان فيهن نمونه
وبعيرهن وصفه جنيه ومصرور= أشعل ووصف الجمر داخل عيونه
وصفرٍ وصف حمسه على غير دافور= حماسها ذربٍ طوالٍ ردونه
وبعيرهن في وجهه الزين منشور= أهل المزاين كلهم يمدحونه
وحمرٍ وشقح طوال ذرعان وظهور= الزين فيهن والبها تاجدونه
زجرة فحلهن كنها دنة نجور= ومن السطر تسمع تضارس سنونه
وليا أعترض وصفه كما وصف بابور= ليا شافه الوبال هيض شجونه
يأهل المزاين ياشغاميم وصقور= بالله علام الجيش ما تزاينونه
وأنتم هل الطولات ما فيكم قصور= واجبكم ارث أجدادكم تكرمونه
ورث الفخر والمجد وأبليس مدحور= اللي ليا طال المدى تمتطونه
عبدالعزيز الفيصلي ركب بالكور= والهجن سجه لين يبست شنونه
يواصل الغاره بغاره ومنصور= فوق النضاء والحرب ترقص جنونه
ويوم القبايل بين ناحر ومنحور= والجيش بأصله والعدد يحفظونه
شعب الجزيره يحفظ الجيش بفخور= وعلى الأصايل وصلوا اللي يبونه
وبعيرنا ريمان بالأصل مشهور= الباديه والحاضره يعرفونه
يلحق كراديس السبايا بلاجور= وليا أنتحى أهل الخيل مايلحقونه
وخلف لنا ريمات كاصيد مذعور= بنات أصيلٍ بالمهر يمهرونه
راعيه شغمومٍ محنك ومسطور= كم شيخ قومٍ واجه الموت دونه
قبل الصباح وقبل مالبندق تثور= خوفٍ عليه من الرمي يبعدونه
مخصص له فارسٍ ذرب ممرور= فريدسياً بندقه ما تخونه
وليا أعترض صابور في وجه صابور= فرادسه يوم اللقى يحتمونه
وريمان رقم أثنين بالأصل مخبور= بريمان الأول بالعدد يركزونه
أبعير أبو سته ومدهـاله القور= أصيل وأصل الجيش له ينسبونه
ينزل من الإكليل لفياض عثمور= والراس الابيض مرتعه في ركونه
من طيب ساسه دونه الدم منثور= عوامره بسيوفهم يمنونه
ريمان لبن غنيم ما فيه منكور= بريمان الأول بالعدد يثبتونه
أصيل وكواعه بعيده عن الزور= ما تلحقه بالجري كل امعنونه
الفضل لله ثم راعيه مشكور= قال الجمل عن عبس لا تمنعونه
وخلال عقد أنتاج ريمان مكثور= ريمان أبن ريمان وصفه ولونه
أنتاج حرٍ بأصله الجيش معمور= بني رشيد بجيشهم يملكونه
كتبت عن ماضي وحاضر ومنضور= وهرج الصحيح الناس ما ينكرونه
وكل القبايل تمتلك مجد موفور= طيب وشهامه والثناء يكسبونه
ألهم قيم عليا وحنا لنا دور= وذكر الوفاء أهل المجد ما يجحدونه
وحنا نقول الحق مانشهد الزور= واسباع نجد النور ما يكتمونه
وختامها صلو على خير مبرور= أبن الذبيحين النبي تتبعونه