وجه البسيطه كل يوم ايتغيّر = وجهٍ على ماقيل مابه طلاقه
أشعربما اشعرفيه ضيفٍ مسيّر= على بخيلٍٍ ما يبا ألا فراقه
ماني على الإحساس هذا صغيّر= بيني وبينه من حياتي علاقه
من كثر ماجربت فاجر وخيّر= شفت المعقّد بالسلوك الدقاقه
أدخل مع الأبواب لأجل أتخيّر = أما جمل. وألا على قل ناقه
إن ما مشيت الدرب والدرب نيّر= ابلش بدربي في غشيم السواقه
الوضع هادي. والهداوه تحيّر= كنه على خطْ أيتحرى انطلاقه
نود الهوا في حكم ربه مسيّر= وأيضا الهبوب ألها زمان اصطفاقه
ماهو تكهن غيب. وألا تطيّر= أومثل ماتقول العرب .هوش. ساقه
توحي لقلبي حنة أم الحويّر= شيءٍ .تجزيني مرارة مذاقه
بين الحنايا تقل جولٍ مطيّر= يصفق خفوقي. ثم يشلع. رواقه
سبره بعيد. وظل عصره قصيّر=لا عاد ليلك. يا عصير الصداقه
عطيتني شيك الشقاوه مجيّر= وحطتيني في هجن يعتب سباقه
وأنا هواي وغايتي من صغيّر= حب الصراحة واجتناب الحماقه