ياهجوسي هجي الفج الخرايم = وانتقي من صادق المعنى بيانه
صاطي المخلاب وسط الراس حايم = راج حتى هاج فكري بكفخانه
اشقرٍ عن نظرت اهل الدون شايم = الجدي وسهيل صاروا من اخوانه
يوم حلّق من تحت دهمٍ رزايم = حن وارزم هاجسي ثقل ورزانه
ياقبائل عبس ماسمع كل لايم = ابتدي واللـه عليه الاستعانه
وينكم ياهل المروه والعزايم = التخاذل بالامر مثل الخيانه
المساعي غامضه والجو غايم = والخباثه تلبس ثياب الميانه
والتهايم تاصلك لو كنت نايم = من عبادٍ طبعها ظلم ولعانه
والسبب تركه على المسلم ظلايم = واكثر ذنوب البنادم من السانه
العزايم من فوايدها الغنايم = والمهانه للرجل مثل الجبانه
واللـه اني عن بعض ماوحيت صايم = صومة اللي صام شهره برمضانه
لين مرني خبيثات النسايم = وايقضن فكري وهاجن في كيانه
مصدر الاخبار مندوب الشتايم = حامل الاسفار مكروبٍ ابطانه
ولو حكيتوا يامروجة النمايم = ماكسبتم ياخبيثين البطانه
مجدنا متعليٍ فوق النعايم = نرتفع والنا على العالي مكانه
القدايم طيبه والحظ قايم = ماطلبنا المجد من رابط احصانه
طبعنا معروف مانرضى الهزايم = للوطن والدين وحقوق الامانه
أسأل التاريخ يعطيك القدايم = وأخذ من حاضر هل الفعل استبانه
وأنت ياراع النمايم مانت دايم = مايدوم إلا كريمٍ جل شانه
البحر لاجاك من قاصيه عايم = هائجٍ والموج خانه فوق خانه
مايخلي لك أثر وإلا علايم = لاتعزوا وأنت بيتك في طمانه
والعلوم اللي على صحون الولايم = من نتائجها المذله والاهانه