ياراكب اللي جاهزن للمشاوير = يشتاق له من حس بالقلب ولوال
لافتر ويله طير القاع تطير = تقول شيهانن على الجول منهال
روح عساك مجار من كل شرير = عسا الولي ينجيك من كل محتال
من دار اخو نوره تروح من عصير= وفي الفجر في دار ماضين الافعال
اخوان مريم ناطحين الطوابير= ريف الضعيف اللي عليه الدهر مال
نصه لقر م ٍ ما يهاب المخاسير = دايم وبيته للمسايير مدهال
قرم ٍ يحط الهيل وسط المباهير = وله مع اهل العرف منهج ومنوال
من روس قوم ٍ للمعادي عواثير = لاجا نهارن فيه للملح زلزال
براك بالقوه رجال ٍ مشاهير = عز الصديق وللعداء سم قتال
بلغ سلامي عد ماغرد الطير = وعداد مايمطر من المزن همال
سلام ٍ احلى من حليب المصاغير= ولذ من شهد العسل عند عسال
واليا وصلت مخدر اللبن تخدير= ارتاح وشرب لك من اللبن فنجال
وقله يابو تركي نبا منك تفسير= جاوب على السؤال ياطيب الفال
وين الرجال اهل الوجيه المسافير= اللي لهم بالمرجله دور فعال
اللي مجالسهم وقارن وتفدير= ويلقا بهم عن لاهب الشمس مقيال
اقفت بهم سود الليالي مدابير= ماكنهم ركبو على كل مشوال
وين البداه اهل السلف والمظاهير= اللي مشاهد نشرهم يشرح البال
اهل الرباع مكرمين الخطاطير= الضيف يالقا عندهم قدر وجلال
معطانهم تذري عليه المعاصير= ماتقل صار الهم على العد منزال
طلع بعدهم جيل ياخاتمة خير= جيلن يابو تركي به الفكر يهتال
على القريب يصورالكذب تصوير= ينسا الفقير وينذكر راعي المال
لاصار عنده مال لو هو معيثير = يذكر ويطلع له تواريخ ومثال
واليا انفقر لوهو ولد سالم الزير= تهاونو بامره ولا يعد رجال
وقتٍ حصل به تاللي الوقت تغيير = وقت ٍ به السرحان يخضع للا ثعال
من عقب مايفرس باياديه ويغير = اليوم صار لراعي الضان مرسال
والله وعلم من بعدها وش ايصير = دنيا تقلب ماعرفنا لها اشكال
وسلم وقاك الله صدوف المقادير = عساه يختم لك على زين الاعمال
وتمت بذكر مصخر الكون تصخير= الواحد اللي لصعيبات حلال

نافع صالح عزام الرشيدي

وهذا مردي على قصيدة نافع صالح

حي الجواب وحي راع التعابير= اهلا هلابه عد موجات الارسال
ماحن ونحاء بالقنوف المزابير = برق ٍ سمروسط المزن يشعل اشعال
وعداد مافوق الوطا ساير ايسر = من خلقت الدنيا من اول الى التال
ومايكسي ارض الله جمال النواوير= اليا شبكت في حاجرن تو ماسال
اليا ومر جبار عظم المكاسير= وساق وتساقا لين عداء على الجال
ومن بعد هذا ماتفيد المعاذير = مافيه تجنيبه وصده ومحوال
طوفت الاولى منشغل ماهو تقصير= والثانيه جتني وانا رايق البال
واخذت من صاف الذهب بالقناطير= اخذ جديده وترك الحثل وسمال
صغت البيوت اللي تشوق الشواعير= اليا دخلت سوق الشعر سعرها غال
فيها من العنبر مع المسك تذكير= وفيها من الريحان قيمه ومعدال
كله لعينا من شكالي من الغير = مالو وشاف الدهر مع ميلهم مال
ويقول عطني عن هذا الوقت تقرير= وعطيه نبذه وقصر اشرح لوطال
اشوف ماشفته من السيف لنير = تخالطت زهر الثعالب ولا شبال
شفت الحفاه يجمعون الدنانير = وقامت تطاول بالبنا راع الاموال
ولامر سند لدفوش المحاقير = وهوه من اول مايطالع بما قال
بانت يابو صالح جميع المحاذير = قرب كلام المصطفى مابه اجدال
والخير زاد وبذر الخير تبذير = سور الولائم يانتهت كنه اجبال
غير الغنم حطو حوار المغاتير= ماهو كرم هذ تباهي بالافعال
اليوم يانافع زمان المزامير= وقت المغني والمزمر وطبال
ولا قول خليت فيه بالمجمع خير=لاكنهم قله يعدون وقلال
اما البداه اقفت ولا به مداوير = راع الغنم ماغير هندي وبنقال
اثر بها وقت الحضارات تاثير = لاترتجيها تعود وانته ابها الحال
وان قمت تسمع هرجت صوير وعوير= يشيب راسك وانت في سن الاطفال
اقصر قدم رجلك لياشفت تقصير = عن كلمتن يركض بها كل دلال
ولالك شغل باللي فعل عمر بعمير = ولاانته مكلف تنتقد كل ماقال
وهذا الزمن مابه تقدم وتاخير = تاتيبه اجيالن وتفنا به اجيال
والخاتمه يامن بيدك التدابير = ياواحد ن في كل الارزاق كفال
تفكنا ياربنا من زمهرير = وتجعل لنا في جنة الخلد مدخال
عفوك ليا ضاقت علينا المعابير = في ساعتن عبدك فلا غيرك ايسال
وسلم رعاك اللي رعا صاحب البير = اللي حذ ف بالبير في جرهد اللال