........................................................... = على بنت الخيال اللي كساها الشعر جلبابه
تزبرق بالمرايا الخمس لامن كحّل العشــّيق=عيون أوراقه بميلٍ مابين إبهم وسبّابه
أبي ترسم على وجه السطور بريشة الذوّيق=تزحلاق الندى في وجه منسابه ومرتابه
وابيك تزين أوراقي من مروج الزهر والشيق=مثل ماحمرة آخر هالنهار تزين غيابه
وابي تغسل عيونك من نعاس العسعسه وتفيق=على صوتٍ يهدهد بلبل الخفــّاق زريابه
وانا ابحلب سحاب الشعر واصبه بفمّك ريق=إلين أشوف ثغرك من حلاته يقطر لعابه
وابزوّد حلاه اشوي وازله مع الأبريق=مخدّر شاعرٍ تلقيمته من أصبع أتعابه
وابغلق هالعيون برشفته واقرى ورى التغليق=حروف أعمى مشخمطها بعرجونٍ تقدّابه
عشان أركز على جدار الصور مسمار للتعليق=لصورة فكر شاعر ماوقف فكره على بابه
وكثر ماني مركّز قمت أحس أني من التحديق=كأني جفن في طرف الورق ماحرّك أهدابه
أحاول أقنص احرار الصور في زحمة التحليق=عشان أنفي من طيور الشعر هدهده وغرابه
وابطهّر معاني دنـّست من عاهر التلفيق=مادام (النهر) يطهر من محيط المدح والقابه
كفايه سربل المعنى يده من طهبل التصفيق=على اركاك الكلام اللي يغث السمع يايابه
وبعد من طمّ هالمعنى خضع واستفحل التنطيق=كأنه قال تحته هيه أنا سيفه وأنا حرابه
وانا عمّ الوزن والقاف لكن صنعة التبريق=تجي (بالواو) والأسطاء شويعر كشـّر أنيابه
لذا بشخل حروف الشعر يامستشعره وأريق=حثالة شاعرٍ لامن تغنـّى عجعج ترابه
تعبت أهدّي أعصاب القلم وأفش بالترويق=مزاجيّة شعورٍ لو هدى ماهديت أعصابه