[رشيد]

.


نطوي مع الأيام عامٍ ورى عام

وتمر ساعات الفرح في دقايق

أيام راحت بالعمر مثل الأحلام

يوم ٍ بها زعلان .. وأيام رايق

درست من دنياي وأتعبت الأقدام

وبدلت عن بعض الطرايق .. طرايق

وكفخت بأفكاري كما الطير لاحام

وما عاقني عن ماكر العز عايق

يا صاحبي خذني معك سيف.. وحزام

ويّاك في وقت الرخا .. والضوايق

ترى البشر يا خوك منقسمه أقسام

بين الردى .. والطيب شفت الحقايق

لقيت من صلى .. وزكا .. ومن صام

ولقيت منهو لأقرب الناس بايق

ولقيت من قلبه حقودٍ .. ونمام

ولقيت من قلبه يعز الرفايق

ولقيت من يبني الأمل فوق الأوهام

واللي يموت ولا يعرف العوايق

ولقيت من يملك بساتين .. وأنعام

واللي من الحاجه ينام أمتضايق

الله خلق هالخلق ساده .. وخدّام

ذي دبرة الرحمن رب الخلايق

وآخرك يا بن آدم ترى قطعة الخام

أمرٍ أكيد .. وما يبي له وثايق

يالله عسى ما كون قطّاع الأرحام

وعساي من عقب القبر في حدايق

جاك الكلام وخذ معه بصمة إبهام

أن العمر كله مجرد دقايق


-

للشاعر مطلق الثبيتي -رحمه الله-

.

الموضوع الأصلي: درست من دنياي وأتعبت الأقدام.. | | الكاتب: رشيد | | المصدر: شبكة بني عبس