قصيدة الشاعر سعد بن سعود العجوين ورد الشاعر لازم ظاهر العجوين:-
•يقول الشاعر سعد بن سعود العجوين :
و فكري اللي كن فيه أنعماسي
يجيه شيّن يقلبه ثم يعميه
سبت علوم أهل القلوب الخساسي
اللي يجيب الهرج واللي يوديه
يلبنون الهرج من غير ساسي
وكلاً يقول وتعمي عيونه يديه
كلامهم خافي وفيه ختلاسي
وعييت أميز وين رأسه ورجيله
ناسٍ تحط بناسٍ عيب ومساسي
والعيب من يجرح مشاعر بنيخيه
طبوعهم شينة وفيها إنعكاسي
والكل منهم حاضره مثل ماضيه
فعل الردا والطيب فيه متواسي
وبعض العرب طيبك ماهو نافعٍ فيه
وبعض العرب مافيه ميز وحماسي
يرضي عدوه ويتجاهل إبناخيه
عن الكلام الزين تقل متناسي
والشين يفطنله وفكره معبيه
يتابعك لو هو بشيٍ طفاسي
يزرا على العالم و هو علته فيه
الليا سمعته قلت هذا سياسي
وهو سفيهٍ يخم عقله ويخطيه
وأبعد عن الأرض الهيار الخفاسي
وأزبن على رجمٍ طويلاً تعديه
الكهرباء لصار فيها التماسي
طبلون بيتك لازم أنك تطفيه
ولا يفصّل الخياط غير مقاسي
وكلن على جسمه ثيابه تغطيه
وبداية الصخنة يجيك العطاسي
ومن يتكل ربه من الشر ينجيه
تكفون ياشعار يا أهل الحماسي
اللي عنده رد شعري يجاريه
*******
•رد الشاعر لازم ظاهر العجوين:
نبي لنا كيفٍ يطير أعماسي
كيفٍ على غاية مرامي مسويه
نويت أجاري صادقين الإحساسي
اللي وجوب الضيف دايم تلبيه
لا ياسعد خلك جبل دوم راسي
لو مرته صلف الهوا ما توطيه
أترك هروج مقابلين التباسي
اللي من النعمة كبيره علابيه
ماله جلوسٍ في علو الكراسي
لا هو على دينك ولا أنته مماشيه
صاف الذهب معروف ماهو نحاسي
يا الشاعر اللي طيباتٍ مباديه
هرجٍ بلا معنى مصيره يداسي
الرجل شوفه يا البناخي يقديه
كثرت هروج اللي تكد التكاسي
اللي يلحن قاف واللي يغنيه
لا تصير دايم ياسعد دوم قاسي
الحر مثلك ياسعد مانوصيه
خابرك دايم ياسعد دبلوماسي
ماترخي سموعك لو الهرج توحيه
الحر يدمي صيدته فأحتراسي
وقال المثل من يجهل الحر يشويه
عن خوة الأنذال طويت ياسي
حبل الرجاء مبطيٍ مقطعٍ عراويه
وشن السقا لاصار فيه الليباسي
لابد مايقرع لو أنك ترويه
فوق البسيطة شامخات الرواسي
جبال عزٍ من يجيهن تذريه
ولاعاد أطالع في قناة الأماسي
شوفي بعيدٍ وطيب الساس أخاويه
وأبليس في كل المواجيب خاسي
اللي مشى دربه مصيره يغويه