ياصاحبي شف خافقي شوف وش فيه = من يوم غبت الهم بالقلب ساكن
غبت وجروح القلب هدت هقاويه = وحبك وجرحك في ضلوعي تراكن
حبك مناة القلب والجرح كاويه = وعيون حبك في غيابك تباكن
هذا وانا طرق الحزن بس اغنيه = تشتاق لك عيني وكل الاماكن
أحمدسلهود
هلا باللي سرق حزن الزمن من نظرة عيوني
وخلا نظرتي بيضاء لوقت كان سوداوي
أناظر في وجيه الخلق وألقاهم يهنوني
وأنا قبلك تجي ذيب الهلاك بمهجتي عاوي
تلحقت برمق وقتي وعاد الماء لعرجوني
بعد ذاك الجفاف اللي جعله من الضماء ذاوي
رزقني فيك ربي من دعاء ناس يحبوني
وقف حظي على حيله بعد ماطاح متساوي
حبيبي عادي التحطيم من ناس يحسدوني
لأن أكثر عباد الله لا ترحم ولا تاوي
عيوني منك أنا صرت استشف الكحل بجفوني
وإذا به شخص غاوي بالمحبه فيك أنا غاوي
تعال أجلس على عرش الغلا يا مرهب طعوني
لهيب الشوق عاث بداخلي ويدورك ضاوي
تضلل عن وهج حره بضل القلب وغصوني
ولا منه ضواك الليل دور فيهن مخاوي
عصافير الغرام بشجرته قاموا يغنوني
تصدر من نهر حب عليه الضامي الراوي
صدح صوت الغرام بمنبرك يا محرك شجوني
واحس أعضاي مطربها بصوته حضرة الراوي
الآ ياململم شتات السكون امشتت اسكوني
تزلزلني بفرصاد الشفاة اوحكي شرقاوي
حبيبي شف غلاك اجتث عرق الياس من كوني
وخلا نظرتي بيضاء لوقت كان سوداوي....
زلزال الرعود
كل ماتطلع عليه مفاجأة الطريق....اتذكر كلمة من زمان اوحيتها
كلمة تبرابها تجربة عمر الصديق....طشها في بحر آمالي وانا زليتها
قربتها بيض الايام لابواب المضيق....واوقفتلي لين ضاق الوساع وجيتها
اثرها تبرم وصالي مع البيت العتيق....مثل ماقال ابن وسام! يخرب بيتها
والله اني مانويت انقض العهد الوثيق....واترك اعهود على عاتقي حطيتها
لين حال الموج بين السواحل والغريق....واستوت عندي سوا اخذتها او خليتها
مايكلف ربنا.. نفس فيمالا تطيق....اما انا لو هي بودي فنت.. مااعفيتها
اه من صبر صبرته على زيف البريق....انشفت حالي ورجلي وراه احفيتها
كني اللي كل يوم معلق في فريق....الحضر مريتها والبدو مريتها
شيء في حقي وحق النشاما مايليق....لكن اني مثل ما جبتها وديتها
مادرا عنها معي لاالبعيد ولا الرفيق....صغتها في عرش كسرا سنه واخفيتها
لو محاديب الضماير مثل نارالحريق....كل ماشبت بطيب الرجاء طفيتها
اكفخ بجنحان حلمي كما الحر الطليق....واتفاءل ليت الايام تصدق ليتها
من حجا شم الشواهق نظر عيني يويق....حق الارض اللي لو اموت ماطبيتها!
عايض بن صالح الرشيدي (ابو صالح الشويلعي)
البارحه سجلت من صيد الافكار...نزل البيوت اللي نبيلا هدفها
اسبر نظرعيني على النزل واختار...اقز منه الطيبه وخطفها
من شأن ماتسولف مفسرت الاشعار...اللي مضامين البيوت تعرفها
اهل الخيول مروضة قب الامهار...فيما تبيه تعنها وتعسفها
وانا مدنيلي على الدرب فكسار...يخطف من افواه الجوازي لعفها
يوم الركايب بالعصا مطرقه نار...يقطع مسافه دمعته ماذرفها
والخد ميدان المراكب والاحرار...لعل حاضرها يواكب سلفها
لو تختلف باشكالها دمها حار...حذفه وشرهتها على اللي حذفها
منها يصابح دار ويمسي بدار...مسافته لو طالت الله خلفها
ومنها الياخذله مع الدرب مشوار...رجليه بالطرقه ايبين جنفها
ومنها كثير الياقطع خمسة امتار...الناس بالسكه وهو مع طرفها
واقع يشوفونه بعيدين الانظار...اللي زمان العولمه مانصفها
والاقريبين النظر عمي الابصار...ماتحق شوف عيونها من صلفها
والمركز العمده وسلمان عمار...والذيب ابن عطوان يهرف كنفها
شعار اهل معنى ومارد ومصدار...اوتار عسرات اللحون تعزفها
على الذهوب مسلطه مثل الاقمار...و ان لاحضة جرباه تلعن جدفها
يقوله اللي كان مذهب ودوار...ذهيبته ماغيرهم من وصفها
حسد القريب وظلم ناقلة الاخبار...لو ابدت الايام للناس اسفها
..........................................
shoeely (مخاوي)
ياعذبتي في غيابك تعتريني ضيقة الحال
ردي علي الضيا واعطيني المجد وصهيله
اشتقت لاحلى الليالي شوق ما يطري على بال
واشتقت يا عذبتي لعيونك السودالكحيلة
ياماعلى حنجرتك الدافية علقت الامال
واهديت عطرك وهمساتك للاضلاع النحيلة
واشتقت للضحكة اللي صبت من الحلم شلال
والمبسم اللي يشب البرق من سدر المخيلة
تعالي ابغى استريح بظلك الممدود واختال
تعبت واتعبني الركض الطويل بلا وسيلة
تعالي ابغى عيونك معطفي وذراعك الشال
ترجف عظامي من البرد العنيد ومن صليلة
البارحة كنت افكر واعزف التفكير موال
وابكي رماد الليالي والمسافات الطويلة
من يختصرني لوصلك من يبشرني بالامال
من يطفي الشوق في صدري ومن يبردغليلة
قضيت الايام لاجل اعيونك الحلوين رحال
بين الورق والمحابر والطروق المستحيلة
ولمست في بعدك الدرب الطويل امن اشهب اللال
واخضر عود البلح في بيدر الشعر ونخيلة
ذكراك في داخلي جلسة غريب ونار ودلال
وشعاع قمرا ودمعة شوق احر من الفتيلة
لي في عيونك سهاد وفي هدبك الظل مقيال
لكن مااسرفت في فية هدبك وفي مقيلة
وشلون اشوفك واكيد العاذل الكذاب واحتال
وانا نفد صبري الطيب ولا فاليد حيلة
عليك مني سلام وحب يا دلوعةالبال
ما رف رمشك وما ذاب الزهر فوق الخميلة
اتذكريني ليا هب النسيم وحرك الجال
واختل وجه القمر في ماه واطلق به سبيله