تسأليني عن مكاني؟!!
وعن سبايب لهفتي ؟!!
ما دريتي .؟!!
دوّريني ..
بين جفنيك،، جمرتينك،،
فوق صدرك غفوتي
بين رعشات الهدب..
بين أنفاسٍ تعالت من رئاتك
بين زفره وبين شهقه
بين طابور الحروف اللي نطقتي ..
كلّها شوقٍ ورقّه ..
بين صوتك والصّدى..
في ثنايا سَكْرِتِيْ
في خيالك،، في سكونك أستكين
بين منظوم القلاده حول جيدك..
بين خلخلة الأساور..
فُصّ في خاتم يمينك..
بعض برقه لوعتي
بين بعثرة الخُطا..
بينِك وظِلّك ..
بين جسمك والملابس..
بين وجهك والمرايه كان صدري
يمطرِ اللّوحه ربيع..
تنبت آلاف الورود..
وترقص افواج الفَراش ..
ناظريني ..
بدر يسهر مقلتك
أرض ترفع خطوتك
نهر يجري به عبيرك
آآآه ما اجمل لوحتي