القصيده نُشرت في مجلة حياة الناس ابّان اشراف الاستاذ فهد عافت عليها اتمنى ان تحوز على رضاكم.
ما بين امس الطويل وباكر اللي ما بعد شفناه= يموت الحكي كل الحكي في لحظه وتحيينه
صحى كل الكلام ومات كثره وانتهى وعدناه = ملل كل الكلام اللي يموت ولي تعيدينه
لمحت بنظرتك لغز وغموض.. احترت في معناه= متى اشرب نظرتك نور الوضوح اللي تملّينه
مسافاتٍ تطول الوعد.. والممشى الغموض افناه=على ركنٍ سرق من خطوتك دربٍ وتمشينه
على شوفٍ تحرى رمشك اللي وجنتك تشناه=الى انهدْ فوق خدٍ تضحك الدنيا على زينه
تمرد عقرب الساعه على وقت الوعد واطناه=زعل من كثر ما يمشي وفا وانتي تنادينه
وانا في داخلي طفلٍ تعب كثر الوقوف اضناه= ونظرات الملامه تحرقه وانتي تلومينه
وانا اللي مدّ لك صدق ووفا ومعانقه يمناه=ولكنك بنظرات الغموض المر تلوينه
وانا اللي لك بنيت السور واحييت الوفا بفْناه=وتجين بغفلةٍ مني وبيدينك تهدينه
ما بين الموعدين ابسألك عن موقفٍ عشناه=الى مات الوعد في معصمي وشلون تحيينه