ياما جرحتنا وذبحتنا سواليف
والكل جرّّد يم صدرنا سيوفه
ضقنا الملامة من جميع الأصانيف
دارت بنا الأقدار يا هي حسوفه
كنّا على ما قيل نمشي على الكيف
في دنيةٍ كانت علينا عطوفه
ما ندري بالمخشوش وسط اللفاليف
والصّاحب المحبوب ضدنا نشوفه
نضحك غصب مرّات من ذلك الزّيف
طاح الجمل والنّاس تبقي حتوفه
يومٍ معانا الخير كلٍ لنا يضيف
واليوم شفنا سد وجبال وطوفه
قلنا الأمر ساعات يمكن صواديف
والأجودي المعروف محدٍ يعوفه
ودنا بحسن الظّن من غيمة الصّيف
ودنا نزيح الشّك ونجز صوفه
ما نابنا والله غير التكاليف
منهو بنا يا الله يروف روفه
بانت سوالف ناس كانوا معاريف
أضحوا كما شيطان يا شين شوفه
سود الليالي ما بها من تخاويف
نور الضحى أحيان ياتيك خوفه
السّيل يجرف أخضر ويابس الليف
والواقع المهزوز صرنا ضيوفه
من عقب محنا أسياد صرنا مواقيف
واللي نبيه معين طاوي كفوفه
صمنا عن الروحات والنّاس تأليف
أقلامهم تكتب علينا ما نعوفه
آهٍ نعم والله من عالم الجيف
أزمة ذمم واخلاق ما هي معروفه
صرنا بلم متيوح لاحم على السّيف
عن عاتي الأمواج محدٍ يحوفه
وش باقي حتى نقول أو نقدر نضيف
وذي خيلنا المحتار طوّل وقوفه
يا الله وبعد يا الله يا عون لضعيف
عبدك تعب يا الله فرّج ظروفه