ليت النقاش يطول و أبقى مع الصوت
اللي ذبحني فيه لذة نقاشه
يسرد من الواقع و أنا هايم سكوت
اسمع صدى صوته وأعيش انتعاشه
كن ألحكي في حضرته عقد ياقوت
يطلع من اعماقه وأحس ارتعاشه
مستوطن بين الشفايف مع التوت
تقطف لي انفاسه جزايل معاشه
ضاعت حروفي بين مقفي و مكبوت
حرف تلعثم بي وحرف تلاشه
والموت يوم انه ضحك جاني الموت
شي سباني ثم نهشني انهاشه
مدري وش اللي صابني صرت مبهوت
مشلول فكري والعقل في هشاشه
أصبحت عاشق والعشق صار مثبوت
و العشق واضح للملا وضح شاشه
ليت النقاش يطول و أبقى مع الصوت
لو كان فيه الموت راضي نقاشه