[رشيد]

تخفي عليّ الحزن ماودك إيبين
* وأنا أشوفه في نواظرك باين


حزنَ تدسّه تكشفه نظرة العين
* يبين لي من يوم عينك تعاين


عينك صدوقه.. لو كذب وجهك الزين
* لو قال حالك زين ماهوب زاين

ومنين جاك الحزن يالفاتن منين
* فضفض وفتح مغلقات الخزاين


قلي وأنا خلك على العسر واللين
* فالحب.. ما بيني وبينك تباين

وأنا لك إليا نالك من الزمن شين
* مادمت أمانه.. للأمانات صاين

إن كان صدرك ضاق من طولة البين
* البعد فالأنفس مهو فالمداين

حنا ترانا لو بعدنا قريبين
* أقرب من الماطر لخضر الجناين

ما دام عشرتنا من سنين ودنين
* حبّ تشربناه ماهوب هاين

أقرب وفل حجاجك وربك يعين
* والهم ما خلا بهالكون.. كاين

قبلك همومي شبّت بخافقي لين
* شفت المواجع في فؤادي طباين

أبحرت فالدنيا وذقت الأمرين
* هما الرياح تسير عكس السفاين

تجرفني الأمواج مدري على وين
* ماهملتني غير والحال شاين

وذكرت حزني منك في نظرة العين
* طالبك.. اما إضحك.. أو لا تعاين




اسم القصيده وشاعرها
" مغلقات الخزاين "
للشاعر // مرزوق الروقي

الموضوع الأصلي: مغلقات الخزاين | | الكاتب: رشيد | | المصدر: شبكة بني عبس