طير
ــــــــــــــــــــــــــــــــــــــــ
حزين من الشتاء والاحزين من الظما ياطير
دخيل الريشتين اللي تضفك حل عن عيني
دخيل الما ..وملح الما..وحزن الما قبل ماتطير
تهيا للهبوب اللي تصافق في شراييني
دخيل الغصن والظل والهزيل وهفهفات إعصير
دخيلك لاتشح بنجمتي والليل ممسيني
ترفرف يافقير الريش ضيقه والنهار قصير
علامك كل ماليل جناحك جيت ساريني
انا ماني بخير وجيت يمي وانت مانت بخير
وانا ياطير في من الهجاد اللي مكفيني
ترى لو شفت لي ظل ومهابه في عيون الغير
ترى كل الزهاب اللي معي جرحي وسكيني
؛عين تشربك شوف
ــــــــــــــــــــــــــــــــــــــــــــــــــ
بين فرحة لقاك وهم فرقاك
لاتذكرت جرح ولا نسيتك
حي هالشوف ماتنمل دنياك
شف سواة العيون ليا لقيتك
عين تشربك شوف وعين تظماك
لاذبحني ظماك ولا رويتك
قمت اخيلك هنا ... وهناك .. وهناك
وين ترحل بي النظره نصيتك
ان تبسمت قلت الموعد شفاك
وان تمنعت بانفاسي دعيتك
وان طلبت الغلا قلت الغلا جاك
وان سكنت الخفوق البيت بيتك
وان نثرت القصيد بدرب لاماك
ذاع صيت القصيد وذاع صيتك
يارجا العمر لو حفتك الاشواك
ليتك اول طريق القلب ليتك
ودع البرد كف ضم يمناك
صافح الود قلبي يوم جيتك
حي هالشوف رغم هموم فرقاك
لو تناسيت جرحي مانسيتك
؛
الحب الجديد
ــــــــــــــــــــــــــــــــــــــــــــــ
حب جديد .. وقصيدة عشق مجنونه
الله يحييك ياحب لفاتوه
حب لكله .. وحبٍ بس لعيونه
حبين باقصي خفوقي بس له هوه
ايه انصتي ياشجون الروح ممنونه
جاني رقيق المشاعر ناوي الخوه
جاني حبيبي وعمري فرحة غصونه
ربيعها يوم سال السيل من نوه
يوم انهمر لي حنانه باعذب لحونه
قلت الله الله صفا جوي على جوه
والله لـ..احبه ولو حظي وقف دونه
مافيه قوه تصد الحب بالقوه
بس انتظر يازمن لين اعلن المونه
ومن بعدها اللي تسوي يازمن سوه
؛
سيف العشق
ـــــــــــــــــــــــــــــــــــــــــــــــ
كيف أطفي الريح بثيابك وكيف اشعلك
كيف اتنثر على جمـرك وكيـف احتويك
نقضت ليل الحرير وجيت ماانت ل هلك
سمّيت باللي فتني بـك وقلت ابتديـك
هذا اول الدرب او هذا الطــريق اولك
جيت آتوقّا عذابات المدى ..واهتديك
شوقـي مسافـة وهمساتـك مـدار وفلك
ان ماظميتك غلى ..ياعلني ماارتويك
إية اعرفك واعرف اني من غلاك اجهلك
مرات اضمّـك واخـاف اني مشبة عليك
مـرات اشوفـك بنفس الوقت واتخيـلك
وانشد كفـوفي عن اخر سالفة من يديك
أعـنّ لك لـو تصّـب المـوت ...واتهيّلك
واجـوع لـك وآتمـنى خنجـرك واشتهيـك
ماقلـت لك عمر سيـف العشق مايقتلك
ماتشوفني حي قدامك وانا امـوت فيك
اشتقت لك قبل اجيك وجيت واشتقت لك
البارحة طول ليلي بين هذي ..وذيـك
مليت جمـر انتظارك واستحيت أسألـك
واحسبتني ما بعد جيتك وفكرت اجيـك
اثرك بقلبي من البارح وانا استعجلك
واثري نسيتك من الفرحة وقمت احتريك
؛
كثر الكلام
ـــــــــــــــــــــــــــــــــــــــــــــــ
على كثر الكلام ... وكثر ماقبل الكلام جروح
سكت ... ومالقيت الكلمتين الي علي بالي
أخاف إن قلتها ... ماقلتها ... وان قلتها بوضوح
توسدني ملامات الرفيق وشرهة الغالي
كذوبه يالهوجس اللي على الخاطر تجي ... وتروح
بغيت أزبن ذراها ... واستريح وماتهيالي
ورحت أتلي شتاتي ... واترجي صوتي المبحوح
تموج بي الدروب ومسندٍ كفي على ظلالي
عسي مانتي رجايه يابروقٍ في سماي تلوح
يشرهبني رعدها والضما بالصدر همالي
نقلت جروح ماعرفها بقلبٍ مرهف مجروح
تنطحت البياض ... وسود الله وجه عذالي
؛وش بيبقالي
ـــــــــــــــــــــــــــــــــــــــــ
صوتك اللي بقالي من ليالينا
عاد لو غاب صوتك ويش يبقالي
صوتك الموج والمجداف والمينا
صوتك الناس لوني في خلا خالي
صوتك الذكريات اللي اتدفينا
كل ماهل شفت العيد يبدالي
صوتك بعيد مثل البعد يطوينا
صوتك اغليه ... صوتك يابعد حالي
من غروب الكلام لشرق اسامينا
ياحبيبه وصوتك عندي الغالي
سولفي ... لعنبو هــمٍ يبكينا
انت اقصى مدى الهقوات والتالي
مالها حد شرهتنا وامانينا
والمسافات قشرى مالها والي
يقبل الليل لامرفأ ولامينا
عاد لو غاب صوتك ويش يبقالي
عزة النفس
ـــــــــــــــــــــــــــــــــــــــــــ
ينجرح قلب.. لكن ترتفع هامه
والله امي لاموت ولاانحني راسي
لو رماني زماني وسط..دوامه
العواصف شديده .. والجبل راسي
أنقل الحزن وامشي منتصب قامه
قاسي الوقت .. لكني بعد قاسي
واسمع الحلم يصرخ لحظه اعدامه
رابط الجاش ... ماهز الخبر باسي
عزتي غاليه ..والناس سوامه
قلت ماابيع حتى تقطع انفاسي
زانت ايام عمري .. شانت ايامه
مارجيت العزى من رحمة الناسي
من عجز لايدوس الهم باقدامه
لازم انه مع الايام ينداسي
يندمل جرح القلبٍ ..ماتت احلامه
بس ما اظن يبرى جرح الاحساسي
يوم صارت مابين القلب والهامه
وش ابي بالحياة الياانحنى راسي