قصيدة حفل محمد معلث
بسم الله ابدا خير عن كل تعبير=قدام لابدا في كلامي واقوله
وابدا سلامي للوجيه المسافير=واهل الحفل وضيوفه اللي عنو له
عنهم نيابه مرحبا بالمسايير=ترحيبة(ن) مثل المطر في هطوله
ترحيب(ن) احلى من حليب المغاتير=واحلى من الماء بالعطش لاوردو له
اهل حلال ومبعدين المشاوير=وعد(ن) بعيد ولابه عدود حوله
مساكم الله ياهل الطيب بالخير=قبل سباق الشعر تبدا خيوله
انا الحكم والا انت ياسالم الزير=قلي قبل لاتاخذ الخيل جوله
لان هذا الليل عندي انا غير=والناس كل(ن) له هواه وميوله
والشعر ماقلته ادور جماهير=هوايتي من يوم سن الطفوله
لاضاق صدري رحت اغني به اعصير=مع خايع(ن) مترامياتن سهوله
وامدح به رجال(ن)تقود الطوابير=ورجل(ن)تنومس للجماعه فعوله
مثل الذي لعل دربه تياسير=اللي من بعيد وقريب اشهدو له
محمد زعيم الطيب وابن المناعير=اللي سعد منهو نخى وفزعو له
وشاعر ومتعلم ومطنوخ وامير=وماحققه ماكل رجل(ن) يطوله
والنا الفخر من دون بالناس تقصير=حنا هل الطولات واهل البطوله
بني رشيد ان غطرف(ن) الغنادير=والحرب دقت للمعارك اطبوله
اندق في كبد المعادي مسامير=ودخيلنا معنا صعيب(ن) وصوله
والمرجله لو دونها حكم تعزير=ومن وصلها غيب عن الارض زوله
نارد عليها مانحسب لما يصير=وموت(ن) بعز ولا حياه مغلوله
ولو مسنا بالهرج بعض الخنازير=واللي على فصيلته صفقو له
اللي على العثرات دايم مداوير=وهم الردى مترادفينن ذلوله
ماحركوا شعره ولا طيروا طير=الا نفوا ماارسل به الله رسوله
وثنتين منهن ماتفك المعاذير=وفي هالزمان يطلعن الرجوله
المال بريالات والا دنانير=والمنصب العالي بشركه ودوله