قالت تضيق أن غبت بالحيل قلت أيه =أكره حياتي كلها في غيابك
وشلون وأنتي قلبي ملكتيه =أكيد نبضه يختلف في ذهابك
قالت صحيح..؟وقلت ياغايتي ليه =ماتعرفين أني أموت بجنابك
أعشق وصالك وأكره الهجر طاريه =وأعيش لحظات الغلا في رحابك
والليل في ذكراك تطرب مساريه =ويشوقني بالحب لحظة عتابك
والقلب لو بيدك جرحتيه منّيه =ماقول غيرإلا هلا مرحبا بك
القلب وعيوني وروحي وراعيه =كلهن رصيد مسجّل في حسابك
يفداك من تمشي على الأرض رجليه =ويفداك من ذاق الغلا واعتزى بك
قالت حبيبي,,وقلت لبّيه لبّيه =لبّا الخدود اللي زهت في شبابك
قالت أحبك والغلا شف مواريه =وسط العيون السود يشكي عذابك