السلام عليكم ورحمة الله وبركاته
اخواني هذه المحاوره التي جرت بين مشعل العنزي و سلمان ابن عمّار في هذا المنتدى يوم الخميس ليلة الجمعة 27/8/1427
مشعل
قبل لا نبتدي نظم الشعر بسم الله الرحمن=بدايه من هجوسن كل من يفهم يقدرها
وبعدها يا سلامي ردتن نزهم بها سلمان=وانا كلي عذر عن ساعتن كنت متاخرها
سلمان
هلا يامرحبا عني لحالي وأثبت البرهـان=بعد صغرتها ياصاحبي مانـي مكبرهـا
علامك يوم خصيت بسلامك يارفيع الشان=ملا حظتن بسيطة وإرجع لنفسك وشاورها
مشعل
عسى فيك البقا يالشاعر اللي تنظم القيفان=جنيهات الذهب ما كل رجالن يزورهـا
اثر ما فيك حيله لكن الله يقطع الشيطان=منسيني رجالن بالوفا والطيـب نذكرهـا
سلمان
عليه بالحرام إني ماشوف أغلى من الويلان=ماغير أدعي عسى المعبود بعنيزة يكثرهـا
انا مافي حيلة لكـن الله يقطـع النسيـان=ينسي مشعل أهل الطيب مايجبر خواطرها
مشعل
مدامك بالقصيم الحين مشعل يغلي القصمـان=عشان السلعة اللي عندكـم لجلـه تدورهـا
صحيح ان جدكم من شان عبله جمَع الفرسان=وجاب الفين ناقه يوم هلـت لـه عبايرهـا
سلمان
انا ماغليت مشعل لجل أدور سلعة الدكان=ولكن لجل ميزة طيبة سلمـان خابرهـا
وأنا يمكنّي آسوي سواته بآخر الأزمـان=على شان الغلا والطيبة ماني بخاسرهـا
مشعل
انا ضيفن عليكم وانت طيب تكرم الضيفان=وترا عادتكم لضيوفكـم مانـي بمنكرهـا
وانا خابرك ياسلمان طيب تروي الظميان=وتعز اللي يجيك وكل رغباتـه تيسرهـا
سلمان
ليا حليت ضيف آقلطك فوق أطيب الخرفان=على شان عنزة في قدرهـا كـلٍ يقدرهـا
وأنا بارويك مجبر لو أحط بحلقك المحقان=مدام إن الك رغبة والله إني غير أدبرهـا
مشعل
وانا لا جيتكم تهدي لي المهره بدون عنان=تقول ابشر بها و العن على الوجهين خيَِِِِِِِرها
واذا ما تعجبك يالوايلي عطني بدلها حصان=حصان الوايلي يتعب قدم رجلي ويسترهـا
سلمان
الا ياصابرين الصبر طيب والكريم معان=نجوم أصد عنها نظرتي ونجوم أسامرها
ألا يازينها لو إنها فـي داخـل الميـدان=تناظرني صفوف اللعب وعيوني تناظرها
مشعل
الا يا صاحبي وش فيك تخلف كيلة الميزان=ترا قدمك مسافه وانت حاول ما تعثرها
اذا جاك التعب قلي يا مشعل صاحبك تعبان=غرق في شاطي الما وانته الغبات تعبرها