لاتلومني لاجيت كلي من اقصاي
مافي غيرك لا تضايقت جيتك
جيتك ولاغيرك ذكرته بسمراي
جيتك وكل انسان غيرك نسيته
جيتك وانا ماني تايه الراي
جيتك وانا مدري وش اللي بغيته
جيتك وقلبي دقته تسبق خطاي
جيتك اقول مفارقك ماقويته
ان مر يوم بالعمر منت وياي
اشتاق لك شوق المسافر لبيته
مثل الهوى تحتاجه الناس والماي
يحتاج لك قلب (ن) هواك وهويته
انت الوحيد اللي يرد بسمه اشفاي
وانت الوحيد اللي بروحي فديته
دامك معي ماقصرت يوم دنياي
دامي خذيتك وش بقا ما خذيته
وان كان تنشدني بعد ليه انا جاي
ابشرك ابرد بقنعك لاقريته
جيت اعترف بالفرق يأخر مناي
بينك وبيني اللي عشانك جفيته
اني ليا من جيت لك همك ارضاي
واني ليا من جيت له مالقيته