وين أنت ياعشقٍ سكن بـي ولازال
يسئلك طرفٍ غّـرق الدمـع موقـه
مدري قريبٍ حيل أو دونـك أميـال
والا بمغيب الشمـس والا شروقـه
ياهل ترى قابلـت هالحـب بأهمـال
أو أن ذاك البعـد يحرقـك شوقـه
للحين باقي بمسمعي بعض الاقـوال
ونفسي على صوتك تراها شفوقـه
كلي معك .. كلـي معانـاة وآمـال
والحلم الابيض جـاه شـيً يعوقـه
أنا كذا طبعـي اليـا جيـت بأقبـال
ماجيك قـد الظـن : أجيـك فوقـه
وأن ماحصل ياصاحبي حب ووصال
وطير المحبة طار وأطلـق سبوقـه
لاعاد تنشد حالتي .. حالتي .. حال
والروح من سبة جفـاك محرّوقـه
والله لو تدري عن أقصـاي تهتـال
وتشوف كيف الحب جفـت عروقـه
دام الكآبـة لابيـض الحلـم تغتـال
والحزن الاسود جا معهـا تسوقـه
تزحف جموعه وبّددت ضحك الاطفال
وضحكة فرحهم تحتظـر ومخنوقـه
منصور الرويلي