[صالح سعود]

ايها الاخوة الكرام بمنتديات قبائل بتي رشيد . عبس انقل بين يدي لكم قصيدة تشرفت بالقائها في ديوان الفخر
ديوان الشيخ / دهيم بن عبيد بن علوش ابن براك

ارجوا ان تنال رضاكم واعجابكم .

هلا يا مرحبا عز ومهابه = بدار المجد أرحب بالنيابه
عدد ما لا ح بارق عقب بارق = و عدد ما هلت غشون السحابه
عدد ما جت من المنشى ترازم = ترزام جيش في وقت الحرابه
هلا يا مرحبا مليون مرحب = بضيوف الحفل من قرب وصحابه
هلا عداد ما دندن ظميري = طروق الشعر وأدنيت الكتابه
هلا عدد ما قمت أتذكر = رموز المجد ساسه وانتسابه
بحفل اللي على العليا معود = سليل شيوخ لابه عقب لابه
ماهي والله على مثله غريبه = وثوب العز واحد من ثيابه
على العليا على العليا مربى = عسى من جابه الجنه ثوابه
نعم شيخن ووافيتن شبوره = وبيته للكرم مفتوح بابه
دهيم عبيد وعلوش جده = علوش دليم يرحم عود جابه
دليم ابن قاسم وقاسم = ابن براك ذيب (ن) من ذيابه
نعم والله في راعي البويضا = كما النجم الذي يلمع شهابه
فخر لا ما يشادي الا الثريا= اهو ويا الجدي صعب ن مغابه
هم شيوخ القبيلة والقبيلة = سلايل عبس متعبة الحرابه
نعم يشهد لهم يوم المكاون = نهار ن فيه من يفقد صوابه
يا كم شيخن نهار الكون الأول = نواهم بالغدى وصار الغدابه
يجونه مثل لماع الشهايب= و يلقونه معقر في ترابه
مطرهم نار معها سيوف عطشى = تبي للماقف الضامي شرابه
ويا كم فارس شريده من جموعه = بقلبه من بني عبس ارتهابه
يخاف وكل طاري يستشيطه = يحسب الموت في مقدم حسابه
وهو يدري بان الموت حاصل = وتبي تبكيه أمه في شبابه
وكم قوة تجمع عقب قوة = كسرنا الجيش واعلن بانسحابه
سل البدوان واسئل من تحضر = تلاقي العلم وتحصل جوابه
لنافي المجد تاريخ ن مشرف = بدين وصدق وأفعال ونجابه
فخر يرويه راوي بعد راوي = رواية مجد والمجد اقتدابه
نعم جمرة ولا هي أي جمرة = تعب فيها المؤرخ بالكتابه
ودار المجد تشهد بالوقايع = منزال عبس من وقت الصحابه
ديار ن ما ولها كل طامع = ولا يشره عليها باغتصابه
تباهى كنها العذرى تباهى = بزين الدل وبزين الطيابه
ذكرت وها الطواري ذكرتني = طواري وقت ماضيتن ذهابه
وعسى ربي يديم الحكم لانه = قلب باب العداوة بالصحابه
قلبها با ابو تركي يوم عدى = على روس الطوايل من هضابه
وخلاها على الشرع المطهر = على السنه و شرع الله كتابه
عساه بجنه الفردوس ساكن = من الجنه على العالي رقابه
وسارت هالسفينه كل أبوها = تسير بمجد وبعز وذرابه
وأنا والله نظمت الشعر أشارك = بديوان العرب يوم انقرابه
أسجل ما ورث كابر لكابر = ودواة الحبر تفخر بالكتابه
وديوان الفخر بأهل العز عامر = لمن جاله وايضا من لفابه
واختمها صلاة الله وسلم = على محمد وآله والصحابه

شعر – صالح بن سعود بن مصيبيح الفريدسي الرشيدي
حفل افتتاح ديوان الشيخ
دهيم بن عبيد بن علوش بن دليم بن قاسم ابن براك
في 4/10/1429 هـ

الموضوع الأصلي: " ديوان الفخر / بحفل الشيخ دهيم بن عبيد ابن براك " | | الكاتب: صالح سعود | | المصدر: شبكة بني عبس