ليتك معي ساهر
ليتك معي ساهرٍ ليل الهـوى كلَّـه=
ما انوم أنا وإنت لأجل الحبِ سهراني
ترى السَّهر مع حبيبك يبري العلَّـه=
لي صرت شفقٍ وهو عليك شفقـانِ
كلِّش طراته إلى وافق علـى حلَّـه=
وإلا ترى كل شيٍ يالغضـي فـانِ
لاعاش خلٍ تنكَّر عن هـوا خلَّـه=
يومٍ حبيبٍ ويـوم صـار قومانـي
وش فيك دايم تعسر القلب وتتلَّـه=
أخاف يـومٍ يجـي ماعـاد تلقانـي
كلمات / خالد الفيصل
فز الخفوق
فزَّ الخفوق وقلت ياالله عسى خير=
أثر الَّليالي عاد غايـب قمرهـا
مع شوفته نشوه وفـزَّه وتخديـر=
وعيون خـلاَّنٍ تعانـق نظرهـا
يفزَّ له قلبي كمـا فـزِّة الطَّيـر=
والرِّجل كن الَّلي تحتها غدرهـا
ياصبح عمري ياصباح التِّباشيـر=
نوره ملا قلبي وروحي غمرهـا
عقب الفراق الَّلي تعدَّى المحاذيـر=
يبَّس غصون القلب جافي دهرها
ربَّع بروحي عقب ماهي معاسير=
سحابة هلَّـت بقلبـي مطرهـا
وأسقى بها زرعة هوانـا بتقديـر=
غرسـة غـرامٍ بالمحبَّـه بذرهـا
ياعاذليـن العيـن والله مخاسيـر=
والَّلي درى عن حال عيني عذرها
تشوم عيني عن جميـع الغناديـر=
وإن ناظرت عيني فؤادي نهرهـا
ياناس أحبَّـه والمحبَّـه مقاديـر=
هذا هوى نفسي وهـذا قدرهـا
والحب ماله ياهل الحب تفسيـر=
قلبيـن والله بالمحبَّـه أمـرهـا
لى جيت أصوَّر حالة الحب تصوير
وأرد عن حالي لخلِّـي خبرهـا
لقيت وجدي فوق كل التعابيـر=
كل الشِّعر قطره وشوقي بحرهـا