الجرح مبطي ما اشتكـى مـن عذابـه
بينه وبين البـوح ياصاحبـي حجـاب
جرحي وانـا كاميـه واعـرف جوابـه
لاتنشده عن خافيـه مالهـا اسبـاب!!
تبـي تعـرف شلـون..زاد التهابـه؟؟
واستنزف الطعنات سيـف وحـراب؟؟
اسئل ضميرك وانشده..وش جرابـه؟؟
تلقى الاجابه فيه يـا (سيـد الاحبـاب)
دؤن ســؤال وشـاهـده بالكتـابـه
تلقى حروفه دم !! وسطـوره عتـاب!!
ليه الهجر والصـد .. مفتـوح بابـه؟؟
وليه القسى والهم .. تفتح له ابـواب؟؟
وليه الغياب المـر .. ترفـع خطابـه؟؟
(ماتدري ان لي قلب..في غيبتك ذاااب)؟
احـدن يغـيـب ولانشـدنـا غيـابـه
واحدن يحن القلب عقبـه ليـا غـاب
حنيـت لـك حنـت خلـوج غـدابـه
راعي بكـار لاجهـم عقّـب هضـاب
تنعـي تبـي ذاك المكـان وخـرابـه
وشدوا رحيل وزملـوا فوقـه اطنـاب
وهذي همومي يالغلآ.. ويـش جابـه؟؟
(جرح فتق في جرح قاسي ولا طـاب)
جرحك نزف بيـن الضلـوع ولجابـه
وا شيب قلب اللي تشيّب وهـو شـاب
والمشكلـه تـدري.. وتجهـل عذابـه
مقيولتن (هذا بلاء ابوك يا عقـاب)!!!