[محمدالذيابي]

الضيقة اللي بالمحاجر سجينه
والله ما اذرفها ولو تعمي العين
والضيقة الي في خفوقي دفينه
مرت عليها في قبر همي سنين
ماغرني وقتي بيسرهـ ولينه
ولا ذلني لا اقفى عن اليسر واللين
راضي على حالي ونفسي ذهينه
وبيني وبين الناس حد وقوانين
ما افرد شراعي فوق متن السفينه
تبحر بي الدنيا ولا ادري على وين؟!!!!!!!!!!
احفظ مقام القول عن ناقدينه
وليا نويت الهند وجهت للصين
اشوم عن غيري ليا شفت شينه
واصوم عن مجلاس قوم(ن) سفيهين
اسكت ادب والصمت وقت الغبينه
اقسى من الطعنه بلدغ الثعابين
لكن تمسكني حبال السكينه
واصبر واصابر والصبر فيه ثنتين
قيد(ن) على هم النفوس الحزينه
وسيف(ن) على رقاب العداة الشميتين
بالطيب تربطني علاقة متينه
وادري رفاق الطيب صاروا قليلين
وين الرفيق الي تشيلكـ يمينه
اليا كثرت حولك رحاة السكاكين
ماكل من صافحك كفه حنينه
ولا كل من جافاك ينوي لك البين
احذر من الصاحب وعشرة سنينه
اكثر من اعداك اللداد البعيدين

الموضوع الأصلي: أقسى من الطعنه بلدغ الثعابين | | الكاتب: محمدالذيابي | | المصدر: شبكة بني عبس