[الفهيقي]

	بسم الله الرحمن الرحيم هذه الأبيات يهديها سعيد بن نفاع ابن هون الذيابي الرشيدي الى الشيخ صالح حماد الفهيقي هات القلم اكتب من الشعر بيتين = ذِكْر الصديق اللي وفا في كلامه سلام مني عد ندع البساتين = وعداد ما يلبس من الثوب خامه إله تحياتي من القلب والعين = عليك ابن نفاع يهدي سلامه ياصالح الحماد جيناك عانين = يابن الشيوخ اللي عريبن مقامه جيتك بنخوت خير ما غيرها شين = ومالي عليكم يالفهيقي ملامه جاب القرار وشفت ماصار بالعين = أمراً على الجميع يمشي نظامه الناس تحسد والله يخلص الدين = اللي رزق حوت البحر والحمامه ماقفك وافي عند ملوك وسلاطين = تأخذ شهادتها وتأخذ وسامه يقولها اللي من رجالن شجيعين = بن رشيد أهل الكرم والشهامه أنا ذيابي منزلي بين ضلعين = إن هبت الغربي وظلم عسامه تلقى مواقفنا على العسر واللين = عدونا مكسور ماله سلامه حنّا سلايل عبس من تريخ الدين = حنا هل النخوه نكدر عسامه يابن الشيوخ اللي على الطيب ماشين = عدوكو مايهتني في منامه تلقى فمجالسكم رجالن مسمين = رجالهو بالعلم يازن كلامه ودلالهم بالبن تشرب ملايين = تلقى الرجل ياقف بماقف عمامه هرجت وفا ماهي علوم المساكين = جعل الرساله تاصله بالسلامه إله تحياتي من القلب والعين = عليك ابن نفاع يهدي سلامه ……………………انتهت………………………… وهذا الرد إهداء خاص للأخ سعيد الذيابي ولبني رشيد عامه وأرجو إقالة العثرة والهفوات التي لا أعلمها:- هات القلم اكتب من اللي منقين = شعرن مثل صف الفشق في حزامه اتعب بهن لرجال عندي عزيزين = ولا صغتهن من شان ليلى وغرامه صفيتهن صفت دلال الكريمين = وبهرتهن في سيرة أهل الكرامه وجذيتهن عن الهتش والمساكين = وصبيتهن للي رفيعن مقامه بكل شوق ازفهن لك عناوين = للمعرفه هي والفخر والشهامه ياهيه ياللي عصير جنوب ماشين = صالح ابن حماد خوذوا كلامه بالصلصله ليا جيتوا اللي مقيمين = المجد إلهم فيه قمة سنامه ليا جيتهم سلّم سلام المسلمين = عداد ما ظلّم علينا ظلامه لصغارهم وكبارهم والمسنين = وخصوا ابن نفاع إسم وجسامه ما عنه مجنّب لا يسارن ولا إيمين = سعيد ابن هون الذيابي لزامه اللي ليا جوه المسايير لافين = كررم إلحاهم بالفطح مع إيدامه من لابتن يوم الملاقى ضريرين = بني رشيد اللي تعطر حسامه وقل له وصلنا (خاطره) والنبأ الزين = ولا هو غريب إني ألبي مرامه حق الخوي والجار واللي إمتعنين = فرضن عليّه واجبه واحترمه واللي فعلته لك لا تحسبه شين = ربعي لهاذي بالمواقف دعامه ربعي هل النخوه بكل الميادين = والجار له حشمه ونرفع مقامه ربعي لهم روس النشاما نياشين = ليا صار للبارود حس وكتامه ربعي فهيقاتٍ على الضد جسرين = يردون حوض الموت ورد الجهامه واليوم حنّا بظل حكم السلاطين = آل السعود أهل الفخر والزعامه وصلاة ربي عد ماترمش العين = على الرسول اللي رفيعن مقامه …………..صالح حماد الحضيري الفهيقي…………………

الموضوع الأصلي: رد الفهيقي على الرشيدي | | الكاتب: الفهيقي | | المصدر: شبكة بني عبس