[رائد الذيابي]

البارحه ربي كتب لي ومريت
درب(ن) عليه بروق الاحباب لاحت

جيت المكان اللي جمعنا وخفيت
وقامت جروحي للجوارح وصاحت

ياليتني في لفة الدرب زليت
كان العيون من الدموع استراحت

التم غيم الدمع من يوم لفيت
وورق القصيد لشوفة الغيم ناحت

وظحكة مابغى الناس تدري يوم الفيت
لاكنها غصب(ن) عن العين ساحت

حارت دموعي في عيوني وصديت
وأرمشت ابيها ماتبين وطاحت

وعقبه برق فالعين براق واسقيت
خدي و وناتي بصدري تلاحت

وانا احسبني في فراقه تعافيت
وان عبرتي من مدخل الزاد زاحت

اللي يحسبني من البعد سجيت
والا أن عيوني بالرقاد استباحت

ياليتني من قبل لاحبه اقفيت
والا أن دروبي عن دروبه استناحت

أهون علي من البكا والتناهيت
واشلا من شدود على الناس باحت

عرفت كيف الحي يفرق عن الميت
وعرفت قيمة نعمتي يوم راحت

قولو له اني عقب بعده تدانيت
ورجلي عن دروب المعافين شاحت

البعد نار وطاعت العذل كبريت
يقصر على بعده ترا الكبد فاحت


الشــــــــــاعر
محمد بن فطيس

الموضوع الأصلي: الــبـــــارحـــه ربــي كــتــب لــي ومــريـــت | | الكاتب: رائد الذيابي | | المصدر: شبكة بني عبس