[صقر المشعلي]

رساله من الوالد ابرسله للحبيب -- رساله حنان وحب من نفس طماعه

وعندي رجا بالله رب السما الرقيب -- يعوضني اللي راح ساعه ورا ساعه

تسمع كلامي واحفظه لاتقول صعيب -- ولا تصير مثل المركب ان ضيع شراعه

ترا العز مايشرى السوق يالبيب -- ولا كل رجلاً ياخذ العز بذراعه

وكلاً على عمله يبا ياخذ النصيب -- ومن قال انا صوع الدهر فالدهر صوعه

وزرع(ن) زرعته تحصده شوك ولا طيب -- ومن يزرع الحنظل يبا يذوق ملذاعه

وهذي نصيحه واحدة والعيوب تعيب -- وكثر التمادي بالخطا يفقد الطاعه

ترا بعض خلق الله يضرك وهو قريب -- يدور على رميتك في وسط بلاعه

ومن رافق كلاب المحارق يصير كليب -- وليا طاح ماعين من الناس فزاعه

ولا انت بورع يجيبه المزح والتلعيب -- لمنه يطيح بحفرة(ن) مالها قاعه

ترا لو حكمت الارض من شرق للتغريب -- بلا طاعة الله ثم والدك قرقاعه

تعيش بحياتك فقر مع ذل مع تعذيب -- وليا مت في نار(ن) مع أبليس واتباعه

ومن راقب الله ثم والده مايخيب -- تبا تصير له عن كربته سد ومناعه

قريت الوعد هذا بتنزل من مجيب -- وعن المصطفى قريت مثله وبسناعه

بصحيح البخاري في حديثه عن الترغيب -- وعلى شرط مسلم في صحيحه عن الطاعه

لو انك تشوف العين ودموعها صبيب -- وحناني عليكم وانت ورع(ن) برضاعه

وتسعة عشر عاماً وانا أكد كد النيب -- ولا همني جواً خلا وكثرت اسباعه

وتعبت وجلست اليوم والشيب زاد بشيب -- ويبسن عروق(ن) قبل بالدم دفاعه

وابطلب كريم الوجه مايردي النصيب -- عسى الشبل مثل ابوه مايخالف اطباعه

ولا يا حكيم الراي خلك ذرا ومصيب -- وقدوه لمن بعدك وشاعه وسماعه

تراك انت الاول وانت للعله الطبيب -- وكل(ن) يبي يسوي سواياك بنواعه

وحاول تجمع شملهم والفراق صعيب -- وكم واحد(ن) باع الغلا والغلا باعه

ترا ماتفرق قوم فازوا على العزيب -- يبا يفتردهم راعي البل بمقلاعه

ترا أجداك من أول تحد العدا وتجيب -- وقالوا وليد الداب مثله وبوقاعه

وصلاتي عدد ماهز نسناساً العسيب -- على المصطفى وآله وصحبه وتباعه

الشاعر/ صقر المشعلي

الموضوع الأصلي: رساله من الوالد للولد | | الكاتب: صقر المشعلي | | المصدر: شبكة بني عبس