[بنت العبسي]

السلام عليكم ورحمة الله وبركاتة

هذه محاورة دارت بين شاعرنا (بحر الخليج = وسمي المهيمزي ) × شاعر رائع (زابن الدوسري)

اقتباس من مشاركة وسمي المهيمزي بالديره اللي جوها يشفى به القلب العليل=الصيد واجد والمزون بجوها مثل الجبال وانا من البارح افكر بالسمين وبالهزيل=مدري انا اذبح لي جمل والا اتعشى لي غزال

اقتباس من مشاركة زابن الدوسري الديره امست امنه ماحافها القلب الذليل = والحمل ماله ياولد لامن ثقل غير الجمال خل الهزيله وانتبه للآوله وانته دليل = وانته تدور لك عشى ماهو حرام ولاحلال

اقتباس من مشاركة وسمي المهيمزي انا ادري انه مايشيل اثقالها غير الثقيل=الله يبارك بالجمال اللي تروح بالثقال مادام ليلي جاب زابن مانبي غيره بديل=والله ماتسري ذود قوم(ن) عقلوها بالعقال

اقتباس من مشاركة زابن الدوسري الذيب يعرف بالعوى والخيل تعرف بالصهيل = اخذ الحذر لاذعذعت لك من جنوب ومن شمال الله يبارك بالقنا والرمح والسيف الصقيل = القوم دون حقوقها وانته بوضع الاحتمال

اقتباس من مشاركة وسمي المهيمزي اليا عوى لك ذيب ردد ليل يامااطولك ليل=اما اكتفى براع الغنم والا سرى بأم الرخال وحقوقنا من دونها الارواح والفعل النبيل=من عصرنا الاول وعصر اليوم مافيها جدال

اقتباس من مشاركة زابن الدوسري ياذيب ياللي تنسدح لاشفت لك ظلّ ومقيل = خل العشى للي مع المسرى مهاذيبه طوال اهل المغازي لاغزو يلحق بهم مومي شليل = ومالك مع اهل السوق ياوسمي جنيه ولاريال

اقتباس من مشاركة وسمي المهيمزي الذيب ذيب ولايتسمى فيك ياحام النزيل=مال التشابه بين ذاك وذاك يازابن مجال ابيع واشري واتخير بالكثير وبالقليل=مااطاوع الدلال وسط السوق عندي راس مال

اقتباس من مشاركة زابن الدوسري الذيب ماني جاهله لاكن ابو خرطوم فيل = لاكن لاتامن شرور الوقت وظروف الليال ان كانها ثقلت حمولك وش تحط ووش تشيل = ياللي تدور لك جواب جاك مردود السؤال

اقتباس من مشاركة وسمي المهيمزي يانازل الوادي غشاك السيل واغرك المسيل=وانته تجر الصوت وتغني على صفر الدلال وطبع الكريم يقال مايشره على كف البخيل=والله يغير ياعميل الخير من حال(ن) بحال

اقتباس من مشاركة زابن الدوسري مادام جمعت الحطب والزند يقدح بالفيل = السيل ماشفناه والبراق يبرق بالخيال وكف الشحيح اليا قصر ماهوب لكفوفي عميل = ملزوم يسمعني ليامن قلت له روح وتعال

أتمنى من الله ان تنال اعجابكم

أعجبتني فـَ نقلتها كما هي ^_^

الموضوع الأصلي: بحر الخليج × زابن الدوسري | | الكاتب: بنت العبسي | | المصدر: شبكة بني عبس