العمـر رحلـه والليالـي مساييـر=والدرب موحـش والمزاهـب قليلـه
والرزق يابـن ادم بدنيـاك تقديـر=مكتـوب لـك لـو الاوادم تحيـلـه
والعمرعلمـه عنـد وال المقـاديـر=وكل علـى فعلـه يلاقـي حصيلـه
والمجتمع لحقه مـع الوقـت تغييـر=واصبح سمين الهرج يشبـه هزيلـه
اشوف لـي نـاس تبـي لتياسيـر=ونـاس تـدور لــردى وتعنيـلـه
وناس تبي وشلـون تجمـع دنانيـر=وناس تدور كيـف كسـب الجميلـه
وناس اللسنتهم اصبحت كالمناشيـر=ومجلاسهم وسط المجالـس فشيلـه
ان جيتهم تسمـع جميـل التعابيـر=وتقول هالمجلـس قليـل(ن) مثيلـه
انا اشهـد انـه مدهـل للخطاطيـر=وانا اشهد انـه رابـح مـن يجيلـه
ماتـدري انـه مايجيـه المساييـر=مجلـس خنـا ومجمع(ن)لرذيـلـه
والخوض في بعض السوالف مخاسير=والبعد عـن سـب الاوادم فضيلـه
وابوي وصاني وانا تـوي صغيـر=قـال الزمـن حـذراك لا تنحنيلـه
خلك جبل قـدام صلـف المعاصيـر=جبل جبـل ماخـاب مـن يلتجيلـه
والوضع مايحتاج لـه زود تصويـر=من طاب طاب ومن ردى عزتيلـه
فسرت ماعايشت ضمـن المشاويـر=(والهرج يكفـي عـن كثيـره قليلـه )