ردية بين تركي الشدادي وشاعر عبس عيد بن مربح
قصيدة الشاعر / تركي بن عبدالله
ياراكب اللـي فوقـه الخـرج منشـور=يزهـاه مـن شغـل العـذارى فنونـه
تشـدي ظليـم مرتعـه نايـف القـور=متـذيـر ٍ قنـاصـتـه يخـبـرونـه
تجفل ليا اوحت فوقهـا يصـرخ الكـور=وان حسهـا الراكـب تفـرج حزونـه
من سيف جـده سجهـا طلعـة النـور=واحفـظ جوابـي ليـن تلفـي زبونـه
ملفاك من يـروي شبـا كـل مشـذور=يـوم المـلاقـا لابـتـه يشكـرونـه
تلقاه في بيـت ٍ علـى العـز معمـور=علـى الكـرم والجـود شيـد ركونـه
الشاعر اللي هاجسـه يغـرق بحـور=بنـات فـكـره لانـطـق ماتخـونـه
تنقاد له جـزل المعانـي علـى الفـور=كـن الجواهـر فـي حشـاه مخزونـه
كنـه علـى خيـرة قوافيـه مـامـور=بالشعـر يـامـا يطربـنـي لحـونـه
نخيـت قـرم ٍ بالمواجيـب مـذكـور=رايـه نبـا عبـر الصحـف ينشرونـه
اشكي لابن مربح خلـف كـل منعـور=الحـال عقـب الزيـن قفـت ظعونـه
ياعيد قلبي من هوى البيـض مسمـور=والدمع مثل الغيـث لاارهـت مزونـه
حالي بعد فرقا الغضـي قايـد الحـور=حالـة غريـق ٍ يلعـب المـوج دونـه
عليه جرحـي داخـل القلـب محفـور=ماله عـلاج وشفـت منـه المهونـه
جرح ٍ علاجه حـار بـه كـل دكتـور=عجـزوا دكاتـرت الهـوى ياجـدونـه
قالو علامـك قلـت يالربـع مسحـور=فـي حـب مـن ياعزوتـي تجهلونـه
راعي جبين ٍ في دجى الليـل لـه نـور=تنكـب كيانـي نظـرة ٍ مـن عيونـه
رمشه ليا اغضى به على الخد مسطور=يتـل بـه قلبـي وتكـثـر شطـونـه
ونهده كمـا التفـاح بالصـدر مزبـور=ومثل البـرد بيـن الشفايـف سنونـه
يابـو جديـل ٍ كنـه اللـيـل منـثـور=ياعـود مـوز ٍ ناعمـات ٍ غصـونـه
كانـت ليالينـا معـه كلـهـا بــدور=واليـوم مافيـهـا قـمـر يذكـرونـه
اربـع سنيـن وفوقهـا عـدة شهـور=نسبـح بـلـذات الـغـرام وجنـونـه
حب ٍ على وضح النقا فوووووق مشهور=على شـرف وعـن الرذيلـه نصونـه
ايـام كانـت لـي معـه ورد وزهـور=قـبـل الـعـواذل حبـنـا يعرفـونـه
واليوم وقفـوا دونهـا اعـداي طابـور=ولاانفـك بـاب لوصلـنـا يغلقـونـه
من بعد ماكانت لنـا افـراح وسـرور=عجـزوا مراسيـل الهـوى ياصلونـه
اقفى هوى بالي علـى البعـد مجبـور=عن وصلنـا اشـرار المـلا يمنعونـه
بعد بنت فـي قلبـي ابـراااج وقصـور=ناويـن اهلهـا مابـنـت يهدمـونـه
طاعـوا بنـا نقالـة الحكـي والـزور=نـاس ٍ هدفهـم شملـنـا ينكبـونـه
واضحك وانا قلبي من الغيض مفجـور=واجحـد صوابـي واتحمـل طعـونـه
واقـول خلـو كـل ماصـار مستـور=وقولوا لها اني بخيـر ياللـي تجونـه
مابيييه يتكـدر ولـو عشـت مقهـور=عـن حالتـي تكـفـون لاتخبـرونـه
قلب ٍ عجز في حبهـا يسمـع الشـور=ماطـاع فيهـا كـل مـن يعذلـونـه
امسى كما قصر ٍ من النـاس مهجـور=العنكبـوت معشعـش ٍفـي ركـونـه
خافوا بـه الله ياهـل الظلـم والجـور=لـو هـم يهـود اظنهـم يرحمـونـه
رد الشاعر / عيد بن مربح الرشيدي
ياراكب اللي فوقه الخـرج منشـور=عليه مـن شغـل العـذارى فنونـه
اشعل شناح ايديه ماتلمـس الـزور=فـج العضـود موسعـاتٍ متـونـه
الفخـذ قطمـا والاذن راس كافـور=وعينه تقل جمـر ٍ هلـه ينفخونـه
ناب الفقار وذيله أشقـر ومحشـور=مايميزونـه غيـر مـن يقربـونـه
والبطن كنه مـن شوايـاه ممخـور=دايـم مهجنـة الهجـن يدرجـونـه
وحبل بطانه تسعة اشبـار مشبـور=مقلـوز ٍ يعجبـك شكلـه ولـونـه
يسرح من الخفجي زبد صدره يفـور=يشـدى غـزالٍ بالسلـق يطردونـه
وعليه عبسـي ٍ محنـك وممـرور=الـدرب مايحتـاج مـن ياصفونـه
زهيبـه بـر ٍ مطحـن ومـصـرور=ودهن وتمر مـن الفصـم ينظفونـه
والماء بشنه والعصا عـود باكـور=وكلاش فيـه المحرقـات مخزونـه
صبح اربع ٍ مقفن من الخبت بحـدور=قدمـه بجـده لابــة ٍ يحتـرونـه
عند الشدادي حط خرجـه ومشكـور=سلم على خشمـه بلطـف وليونـه
مد الجواب وقلـه الوضـع مقـدور=مـن ظـن فينـا مانخيـب ظنونـه
مـده لقـرم ٍ لاتكبـر ولا غــرور=ريف الضيوف اللي عشاهـم يبونـه
راعي صحون ٍ وسطها يصبح السور=يضحون تالي زادهم فـي صحونـة
تركي ليـا منـه هبـا كـل مثبـور=عز القصير وعـز مـن يزهمونـه
من لابة ٍ وسط الجزيـرة لهـا دور=الطيب في غالـي الثمـن يشترونـه
حـوارث ٍ وافيـن مافيهـم قصـور=المجـد يارثهـم وهـم يارثـونـه
واللي مثل شرواه ماعنـه مذخـور=حق ٍ علـي مشاركـه فـي غبونـه
ماجور ياريـف المساييـر ماجـور=ابشر بجاهـي والسلـف والمعونـه
ياعاشق ٍ في سكرة الحـب مغمـور=عضيض غلـث ٍ وافيـات ٍ حتونـه
يعول كما تعول خلوج ٍ مـن الخـور=شافـت ولدهـا قدمهـا يصلخونـه
عقب اروحت دمه على دمـه تـدور=مـا الله هداهـم بالزمـل يدفنونـه
ويقنب قنيب الذيب في راس عنقـور=ذيـب ٍ عيالـه بالعـوا يشحـذونـه
عدا وعود باشهـب الملـح منـزور=لولاه هـف مـع الشفـا يذبحونـه
الحب سهم ٍ يطعـن انـاث وذكـور=وتنتـج عنـه علـه بليـا سخونـه
ومع الغروب يصيب راعيه حاشـور=يقرا آية الكرسي وترقـص سكونـه
لاشك في سلم العرب شبه محظـور=راعيـه لـو انـه بـري يتهمونـه
ويصير في نظراتهـم تقـل مجـدور=ما تقل ذاقـوا مـن مذاقـه نمونـه
قالوا به العشـاق كلمـات وسطـور=صوارم ٍ حـوض الـدرك ياردونـه
والعرض مثل البنك يحتـاج ناطـور=ولا يحسبون رجـال مـن يهملونـه
وحنا بجكم وشرع والكـف مقصـور=ومن زل سلطـات البلـد يسجنونـه
اصبر وعادي يربض الحـظ ويثـور=وان ثار فـك القفـل لـو يقفلونـه
وعليك باللي يطلبـه كـل معسـور=ترى الأمـر بيديـه والكـون كونـه
ومعك اختصرت الرد من غير مقصور=ارجي عسى اهل المختلف يسمعونـه