نختار لكم قصيدة لشاعرنا الكبير رشيد بن زيد الزلامي..
والذي تطرق فيها إلى مراحل حياة الإنسان:
قالوا تعلمت.. قلت عناد وفراسه
* أجاهد النفس والدنيا واصارعها
ودرست في مدرسة من شيبت راسه
* دنيا العنا اللي قصيفاتٍ مطامعها
تلميذها دايم تكتب بقرطاسه
* تعطيه جملة دروسٍ ما يضيعها
والله عطانا نظر وشعور حساسه
* ناخذ علوم المعرفه من مراجعها
ونساير الوقت ونقيسه بمقياسه
* ونواجه النفس بالواقع ونقنعها
وترى حياة الفتى مهما قوى باسه
* محفوفةٍ بالخطر والموت تابعها
من مبتدأ العمر حتى يلفظ انفاسه
* يمر في مرحله تكثر زوابعها
أول حياة الفتى مشوار وعساسه
* مسافةٍ في عجاج العمر يقطعها
وثاني حياة الفتى يرجع على ساسه
* النقطه اللي بدا منها يراجعها
ياصل لسن الهرم ويضيّع الطاسه
* ويزحف مع الارض ويخطط شوارعها
وليا تلاقت متونه وارتخى راسه
* ضاعت جميع العلوم اللي يجمعها