قصيده بعنوان ابو بدر كتبتها بمناسبة حفل ابو بدر عبيد غانم وتشرفت بـ..القائها في ذلك الحفل
جيت ومعاي القوافي والوله والشعور=وأزكى التحايا وباقات الورود الحمُر
جيت أحمل المسك والعنبر وفوح العطور=في شعري اللي إلى من طلّ مثل القمر
يامرحبا بالضيوف ومرحبا بالحضور=ترحيبةٍ تشمل الحفله طوال السمر
يامرحبا عدّ ماناحت وغنــّت طيور=وحياكم الله على هيل ٍ وبنّ وتمر
للكيف فنجاله وللعود الازرق بخور=للضيف ترحيب للحفلات زل ٍ حمَر
في حفل ابو بدر يلتمّ الفرح والسرور=واللي حضر بالسعاده والسرور أنغمر
ياعبيد أبن غانم العبسي يانسل النمور=طيبك وجودك على طول الزمان أستمر
إن قلت لك صقر مايكفيك ياأبن الصقور=لكنك الحرّ الاشقر والفهد والنمر
الشعر يزدان في مدحك بطرق البحور=والشاعر أظهرلك اللي في ضميره ضمر
يابو بدر والأوادم تنتظرها القبور=والموت من ربنا منزل سبأ والزمر
(الراحله) جعلها بجنان ربّ ٍ غفور=والباقيه جعلها تسعدك طول العمر
وتعيش باقي حياتك بالفرح والسرور=وتغمرك الافراح مع طول الليالي غمر
عبدالله عوجان