السلام
عليكم ورحمة الله وبركاته
اسعد الله أيامكم بالخير والمسرات جميعاً
اخواني واخواتي الأحباء بالله
المعذره عن الغياب اتمنى منكم القبول لعذري
وأهدي لكم هذه المتواضعه
والمعبره عن ماتحتوي طيّاتها
عسى ان تنال إعجابكم وأذواقكم
الراقيه
سنا ناري قبستـه مـن سناهـم=امـاري وأفتخـر فـي مبتداهـم
اركّـز فـي سوالفهـم واسجـل=وأنا ذاك الزمان أصغـر ضناهـم
يا أبو مدح وعزاوي ما أنت الأول=ترى غيرك سرى كان أنت جاهم
تحسب إنك سبقت الناس بـدري=مع أهل الخيـل ياشقـرا وراهـم
لهم شرهـه وشرهتهـم كبيـره=بعيـد الشـك مايدخـل حماهـم
يعيّرنـي قليـل العـرف فيهـم=عقب كبرت جنوبه فـي ذراهـم
سلك عن دربهـم درب المهونـه=ردي الحـظ مايلحـق جـزاهـم
كتبهـم هافـي الذمـه مسلسـل=ويـوم إنـه كتبهـم ماقـراهـم
وإذا صح الصحيح أقول وأشهـد=وسيع العـرف مايجحـد ثناهـم
اشوف ارسومهم تسفـي عليهـا=رمال من البطى يالعيـن هاهـم
اقدم خطوتـي وآقـف وأناظـر=واعزي قلبـي اللـي مانساهـم
الآ ياعـد قـل لـي زاد حزنـي=شقى قلبي تحمَـل مـن شقاهـم
اشوف إلهم بقايـا فـي جنابـك=بقايـا دلوهـم معهـا رشاهـم
يقطَـع مهجتـي ولفـي عليهـم=أقلـد سلمهـم وأشهـر غلاهـم
لكني صرت مثـل اللـي ينـادي=بمهمه يسمـع صيـاح وهماهـم
تحيط أبـه الجبـال بكـل يمـه=صدى صوته يزلزل من صداهـم
ماغير اديارهـم قفـر(ن) بلاقـع=تنشدنـي متـى خبـري معاهـم
وأنا خبري بهم عالـق بذهنـي=لكـن الوقـت ماهـو بالتفاهـم
علامك يادهر وش جـاك منهـم=ألومك ليه ماتـكـرم لحـاهـم
سواد اجباههـم رمـز الشهامـه=وبياض اوجيههم يحمـي قفاهـم
فقـارا مـال وأنفسهـم غنيـه=ولا باعـوا شرفهـم بالـدراهـم
اسـأل الله يسكنـهـم جنـانـه=عسى حسناتهم تمحـى خطاهـم
وسلامتكم
اخوكم
عايض المهيمزي