[هداج]

يابايـع الدخـان لاهنـت دخــان

عطني مرض روحي وعطني طبيبي



عطني صحيبي قلّه القلب حمسـان

يابايـع الدخـان هـذا صحيـبـي



شربه ينومسني ليا صرت عمسـان

يازين كرزه فـوق طبلـون جيبـي



لامن شربته مـودع الهـم طربـان

والشاي جبته واعتـذرت الحليبـي



الشـاي والدخـان وسعـود خـلاّن

واللي جمعهم مر وقـت ٍ صعيبـي



وقت ٍ علي جاير واذا زان لي شان

لين اصبح المحبوب عني غريبـي



ليته حرمنـي كـل مابيـه شفقـان

بس اني اضمن منحرم من حبيبـي



حبيبي اللي غـاب عنـي ولا بـان

ليتـه درا عـن حالتـي بالمغيبـي



راح وتركني في دجا الليل سهـران

اسهر وموق العين لاجلـه سكيبـي



اقفا وانا عقبه على الفرش مرضان

والجرح أيّس من علاجـه طبيبـي



ماحسّب احساب الجفا نجل الاعيان

ولاحسـب قلـب ٍ غدالـه نحيبـي



ولا حسب حال ٍ جذوب ٍ للاحـزان

وجوف ٍ يلوفه لوف حـرّ اللهيبـي



ويله من اللي خابـر ٍ كـل ماكـان

رب ٍ على دعـوة عبيـده يجيبـي



ويابايـع الدخـان لاهنـت دخـان

بشرب وراعـي نجمتـي للمغيبـي


وســلامـــتـــكـــم





الشاعر / سعود رتيبان الجويّر

وتقبلوا تحيات

هدااااااااااااااااااااااااااااااااااااج

الموضوع الأصلي: قصيده الــــــــــــــــى جميع المدخنين. | | الكاتب: هداج | | المصدر: شبكة بني عبس