[العريض]

العام بفرحته يعزف لحون ..

. . . . . . . . . واليوم تحت الأرض ماهو بكوني

لكن أنا في فرحته كنت مدفوون ..

. . . . . . . . . فوق الثرى واليوم موته سجوني

سميت قلبي عقب فرقاه ملعوون ..

. . . . . . . . . هو والليالي عن هناه امنعوني

ياليتني ماعشت لحظه بها الكوون ..

. . . . . . . . . وياليت ربعي في سكات اذبحوني

وياليتكم عن همي اليوم تدروون ..

. . . . . . . . .منه انحرمت ومن عزاه احرموني

حتى بوفاته يوم انا طحت مطعوون ..

. . . . . . . . أخفيت طعناتي قبل لايفضحوني

بكيت لكن ماتظاهرت بالهوون ..

. . . . . . . . أبكي وأقول الموت هو سبة طعوني

وان كان في حبي أنا ماتحسوون ..

. . . . . . . . دلوني لغيره وهناك أتركوني

يااللي دفنتوا جثته ليه تبكوون ..

. . . . . . . .لولا الحيا لاقوول معكم خدوني

منه انحرمت وكنت أنا عنه مسجوون ..

. . . . . . . . ماأذكر لمحته غير مره يعيوني

شفته وكانت فرحتي مالها لوون ..

. . . . . . . . . عجزت لا وصف من لمحته شجوني

ياليتني كنت الكفن يوم تمشوون ..

. . . . . . . . أبقى معه بالقبر ثم تدفنوني

أوليتني .. من خلقكم كنت مجنوون ..

. . . . . . . . أتبع خطاكم والعذر هو جنوني

أبكي وراكم وأدعي ان كان تدعوون ..

. . . . . . . . .مايكفي أنه عاش عمره بدوني

تكفون هاكم عمري اليوم تكفوون ..

. . . . . . . . يرخص حياتي دام خابت ظنوني

مافادني صبري ولافادني عوون ..

. . . . . . . . ولافادني دمع( ن )حرق لي جفوني

يامابكيته والبكاء يحرق عيوون ..

. . . . . . . . ميت او انه حي دمعي بعيوني