هذه القصيده للشاعر سلطان بن وسام الهاجري
موجهة للشاعر ضيدان بن قضعان العجمي
يقول سلطان :
راكب اللي حسها تسمعه من كـل صـوب =مثل زلزال الرعد فـي المـزون المظلمـه
كنها يـوم استـدارت وضاقـن الـدروب =فرخ شيهانٍ على الطلـع ينهـض مُقدمـه
تلها جورج الخواجه وعرّضهـا الهبـوب =وأعلنوا بإطفاء الزقايـر وربـط الأحزمـه
إسم كبتنها خواجة ماهـو بلبـاس ثـوب = أخذ من االفوتكا سك ومن الشـي عدمـه
من سلايل شايبٍ ما جمـع غيـر الذنـوب= والديانة عكس الإسـلام ماهـي مسلمـه
مايعرف يقول هذي شمـال وذي جنـوب= لدليلـة بوصلـة والحـروف مترجـمـه
واهني اللي علـي رحلتـه يلقـي ركـوب =إن رجع وألا توفـى عسـى الله يرحمـه
إن نوى في مشرق الأرض وألا في الغروب= المهـم ينفّـذ الـلازم الـلـي يلـزمـه
فاقدٍ لي شيـخ قـوم غالـي ومحسـوب = محزمٍ في الضيق يابعـز منهـو محزمـه
والجفا من بين الأصحاب عيب من العيـوب =والصداقـة مـن بنـى بيتهـا مايهدمـه
والغلا والكره ما تسكـن إلا فـي القلـوب = بـس مابـه قلـب فيـه الثنيـن مخيمـه
والرجل لاصار بيـت مـذرَّى ومحجـوب =استوى عنـد النشامـا وجـوده وعدمـه
أتحمل مزح الأصحـاب عذبيـن السلـوب= وأتخيّـر وآكـل التمـر واطـش عجمـه
وأعرف الكذبة إليا جات من فـم الكـذوب= لاقعـد يرفـع لسانـه ويرخـي برطمـه
والطرب لامن جرفني مع اللحن الطـروب= أنسف البيت المدمدم علـى اللـي دمدمـه
واقفل الجوال عن راعي الغـوج الهـذوب= وأفصل التعميـم عـن بيجـري واعممـه
زلة الطيّب مـا تجـرح متينيـن الجنـوب= عقب اللـي زلـةٍ مـن صحيبـه تفحمـه =
يه ياضيدان والنـاس حـارب ومحـروب= والأعـادي كـل واحـد بحبـره وقلمـه
الشاعر سلطان الهاجري
وهذا رد ضيدان بن قضعان :
راكب اللي كنها البرق في عرض النصوب= دايـمٍ مسـرى الليالـي عليـه معلمـه
بكرةٍ كن خف يدها على الزور مغصـوب=لاعقلها اللي عسيفـه مهيـب مخزمـه
وإن تساوت واستعدت لها وصفٍ عجوب=كنها تدي القسم عند قاضـي المحكمـه
وإن جذب ركابها الصوت باسلوبٍ عذوب=أزجلت ما كنهـا ألا هنـوف مخمرمـه
وكنها قشعٍ تزبر على صـدر الجـذوب=لاخذت في صحصح البيد سكّ ودرهمـه
ما شريناها من السوق من جيز الجلـوب=من سلايل جيش جـدي ذلـول مكرمـه
تنحر اللي كل مـا تبـت عيـا لايتـوب=صاحبٍ أغليه جـداً وأعـزه واحشمـه
صاحبٍ من لابـةٍ مايهابـون الحـروب=بني هاجر فخر الأمجـاد كفـو الملحمـه
مثل ما تجمع شبابه عتيبـه والحـروب=بيننا حلـف وعهـود وعقـودٍ مبرمـه
كان يا سلطان ناسيه وصياحـك طنـوب=مرحباً بـك وانتبـه والـدروب ملغمـه
والجفا من بين الأصحاب يالصاحب مهوب=عيب لكن غيـره العيـب ياللـي تفهمـه
والصداقة كنز ماهيب تسمل سمل ثـوب=وللصديق إن صار ما صار ماذوق لحمه
له علي إن حده الوقت في الشدات أنوب=ولي عليه الياكـره صاحبـه لا يظلمـه
والرجل لاصار بيته حجر والسور طـوب=ماعليـه مـن المنافـق ليـا رزّ علمـه
عادني من دون روحي ليا شبت شبـوب=والاكـم وكـم دهانـي رمـوزٍ مبهمـه
وكم نواني من الأصاحيب دجـالٍ لعـوب=-يبي يأخذ خيرة إبلي وأنا خـذت غنمـه
ومعرفة بعض الأصاحيب ذنب من الذنوب=علةٍ مـن علتـه أون يـا مثقـل دمـه
وعلته ما هيب تنشـاف بالميكروسكـوب=ودك أحياناً ليـا طـال صوتـه تكتمـه
والرجل لاصار شيخٍ عزيـزٍ ومحسـوب=استـوت زلـة لسانـه وزلات قـدمـه
ايه ياسلطان والنـاس غالـب ومغلـوب=والأعادي من تحاكـا حثينـا فـي فمـه
الشاعر ضيدان بن قضعان